கோலாலம்பூர், லெபோ புடுவில் உள்ள ஒரு கடையில் RM85,000 ரொக்கம் திருடப்பட்டது தொடர்பாக மூன்று போலீஸ் அதிகாரிகள் கைது செய்யப்பட்டுள்ளனர். கோலாலம்பூர் காவல்துறைத் தலைவர் அலாவுதீன் அப்துல் மஜித், இந்த விஷயத்தை உறுதிப்படுத்தியதில் 26 முதல் 35 வயதுக்குட்பட்ட மூன்று காவல்துறை அதிகாரிகளும் விசாரணையில் உதவுவதற்காக செவ்வாய்க்கிழமை வரை நான்கு நாட்கள் காவலில் வைக்கப்பட்டுள்ளனர் என்றார்.
வெள்ளிக்கிழமை நள்ளிரவு 12.36 மணியளவில் திருட்டு தொடர்பான அறிக்கை கிடைத்ததாக அவர் கூறினார். முந்தைய நாள், நகர மையத்தில் உள்ள ஜாலான் சிலாங்கில் இருந்து ஆவணமற்ற புலம்பெயர்ந்தோருக்கு எதிரான பெரியளவிலான நடவடிக்கையில் போலீசார் ஈடுபட்டிருந்தனர். 1,100க்கும் மேற்பட்ட வெளிநாட்டவர்கள் கைது செய்யப்பட்டனர்.
திருட்டு குற்றத்துக்காக 380ஆவது பிரிவின் கீழ் இந்த வழக்கு விசாரிக்கப்பட்டு வருவதாகவும் குற்றம் நிரூபிக்கப்பட்டால் 10 ஆண்டுகள் வரை சிறை தண்டனையும் அபராதமும் விதிக்கப்படும் என்றும் அலாவுதீன் கூறினார்.
பொதுமக்கள் இந்த வழக்கைப் பற்றி ஊகங்களைத் தவிர்க்குமாறு கேட்டுக் கொள்ளப்படுகிறார்கள். ஏனெனில் இது விசாரணையை சீர்குலைக்கும் அல்லது பொதுமக்களின் கவலையை ஏற்படுத்தக்கூடும் என்று அலாவுதீன் ஒரு அறிக்கையில் தெரிவித்துள்ளார்.