வாஷிங்டன்: ஹமாஸ் குழு சண்டை நிறுத்த ஒப்பந்தத்தை மீறி ஆயுதங்களை கைவிடத் தவறினால், இஸ்ரேலிய படைகள் மீண்டும் சண்டையைத் தொடங்க அனுமதிக்கப் போவதாக அமெரிக்க அதிபர் டொனால்ட் டிரம்ப் எச்சரித்துள்ளார்.
சிஎன்எனுக்கு அளித்த தொலைபேசி பேட்டியில், “ஹமாஸ் ஒப்பந்தத்தின்படி நடந்துகொள்ளவில்லை என்றால், நான் ஒரு வார்த்தை சொன்னாலே போதும்; இஸ்ரேல் தெருக்களில் மீண்டும் நடவடிக்கைக்கு இறங்கும்,” என டிரம்ப் தெரிவித்தார்.
இதேபோல், இஸ்ரேலின் தற்காப்பு அமைச்சர் இஸ்ரேல் காட்சும், “ஹமாஸ் உடன்பாட்டை மதிக்கவில்லை என்றால், இஸ்ரேல் போரின் அனைத்து இலக்குகளையும் அடையும் வரை நடவடிக்கை எடுக்கும்,” என எச்சரித்தார்.
அமெரிக்க ராணுவத்தின் மத்திய கிழக்கு தளபதி அட்மிரல் பிராட் கூப்பர், ஹமாஸ் குழுவை “வன்முறையை உடனடியாக நிறுத்தி, அப்பாவி பொதுமக்களுக்கு எதிரான தாக்குதல்களை முடிக்குமாறு” வலியுறுத்தினார்.
அதேவேளை, ஹமாஸ் அதிகாரப்பூர்வமாக ஆயுதங்களை கைவிடும் உறுதியை இதுவரை வழங்கவில்லை. காஸா நகரில் 30-க்கும் மேற்பட்ட பாலஸ்தீன பாதுகாப்பு அதிகாரிகள் ஹமாஸ் தாக்குதலில் கொல்லப்பட்டதாக தகவல்கள் தெரிவிக்கின்றன.
இதற்கிடையில், இஸ்ரேலின் ராணுவ ஒருங்கிணைப்புக் குழு (COGAT), காஸா மற்றும் எகிப்து இடையிலான ராஃபா எல்லைப் பகுதியில் மனிதநேய உதவிப் பொருட்கள் அனுமதிக்கப்படும் வகையில் தயாரிப்புகள் நடைபெற்று வருகின்றன என்று தெரிவித்துள்ளது. கெரெம் ஷலோம் வழியாக உதவிப் பொருட்கள் தொடர்ந்து அனுப்பப்பட்டு வருகின்றன என்றும் அந்த அமைப்பு கூறியுள்ளது.
