கோலாலம்பூர்:
மலேசியாவின் அஞ்சல் துறையில் முதல் முறையாக, போஸ் மலேசியா நிறுவனம் தானியங்கி (Self-driving) வாகனங்களைப் பயன்படுத்தத் தொடங்கியுள்ளது. இந்தத் திட்டத்தை தகவல் தொடர்புத் துறை அமைச்சர் ஃபஹ்மி ஃபாட்சில் தொடங்கி வைத்தார்.
முதற்கட்டமாக, இந்த வாகனங்கள் தேசிய அஞ்சல் மையத்திற்குள் உள்நாட்டு வசதிகளுக்காகப் பயன்படுத்தப்படும் என்றும், இது அஞ்சல் கையாளுதலில் உற்பத்தித்திறன் மற்றும் செயல்பாட்டுத் திறனை மேம்படுத்தும் என்றும் அவர் தெரிவித்தார்.
இந்தத் திட்டம் தற்போது ‘ஆதாரச் சோதனை’ (Proof of Concept) நிலையில் உள்ளது. அடுத்த மூன்று முதல் ஆறு மாதங்களுக்கு, அஞ்சல் மையத்திலிருந்து முக்கிய அஞ்சலகங்களுக்கு இடையிலான இடைநிலை வழித்தடங்களில் இந்த வாகனங்கள் சோதிக்கப்படும்.
இந்தத் தொழில்நுட்பத்தின் வெற்றிக்கு 5G போன்ற டிஜிட்டல் உள்கட்டமைப்புகள் மிக அவசியம் என்றும், இதற்காக அரசாங்கம் பல்வேறு அமைச்சகங்களுடன் இணைந்து செயல்பட்டு வருவதாகவும் அமைச்சர் குறிப்பிட்டார்.
தானியங்கி தொழில்நுட்பம் அறிமுகப்படுத்தப்பட்டாலும், இதனால் ஊழியர்களுக்கு வேலை இழப்பு ஏற்படாது என்று அமைச்சர் உறுதியளித்தார்.
தொழிலாளர்களின் நலனைக் காக்க அவர்களுக்கு மறுபயிற்சி மற்றும் திறன் மேம்பாடு வழங்கப்படும் என்றும் அவர் கூறினார். மேலும், அஞ்சல் சேவைகளை மேம்படுத்த போஸ் மலேசியாவுக்கு அரசாங்கம் 50 மில்லியன் ரிங்கிட் நிதியுதவி ஒதுக்கியுள்ளதாகவும் அவர் தெரிவித்தார்.
