கோலாலம்பூர்:
மலேசியாவில் 2018 முதல் 2022 வரையிலான காலகட்டத்தில், ஐந்து வயதுக்குட்பட்ட குழந்தைகளின் இறப்புகளில் சுமார் 30 விழுக்காடு பிறவிக் குறைபாடுகளால் (Congenital Anomalies) நிகழ்ந்துள்ளதாக மலேசிய சுகாதார அமைச்சகம் தெரிவித்துள்ளது.
இந்த வயதுப் பிரிவினரிடையே, உயிரிழப்புக்கான இரண்டாவது முக்கிய காரணமாக பிறவிக் குறைபாடுகள் கண்டறியப்பட்டுள்ளன. நரம்பு மண்டலக் கோளாறுகள் மற்றும் அறுவை சிகிச்சை சிக்கல்கள் இதற்கடுத்த இடங்களில் உள்ளன.
நாட்டில் பதிவாகும் பிறவிக் குறைபாடுகளில் 55% மரபணு தொடர்பானவை. இதில் டவுன் சிண்ட்ரோம் (Down syndrome), எட்வர்ட்ஸ் சிண்ட்ரோம் (Edwards syndrome) மற்றும் படாவ் சிண்ட்ரோம் (Patau syndrome) ஆகியவை அதிகம் காணப்படுபவை.
பிறக்கும்போதே குறைபாடுகளுடன் இருக்கும் குழந்தைகளின் எண்ணிக்கையை மட்டும் சுகாதார அமைச்சகம் தனியாகப் பதிவு செய்வதில்லை. தற்போதைய அறிக்கைகள் சிசு மரணங்கள் மற்றும் ஐந்து வயதுக்குட்பட்ட குழந்தைகளின் உயிரிழப்புகளை மட்டுமே மையமாகக் கொண்டுள்ளன.
பிறவிக் குறைபாடுகளைத் தடுப்பதற்கென பிரத்யேக தேசியத் திட்டம் ஏதுமில்லை என்றாலும், தாய்-சேய் நல சேவைகளின் ஒரு பகுதியாக விழிப்புணர்வு மற்றும் சுகாதார ஆலோசனைகள் வழங்கப்படுகின்றன.
டவுன் சிண்ட்ரோம் போன்ற பாதிப்புகள் பெரும்பாலும் தற்செயலான மரபணு மாற்றங்களால் ஏற்படுபவை; இதற்குப் பெற்றோர்கள் காரணமல்ல என்பதை மருத்துவர்கள் சுட்டிக்காட்டுகின்றனர். எனினும், விழிப்புணர்வுடன் இருப்பது அவசியம்.
கர்ப்பத்தின் 10-வது வாரத்திலேயே செய்யப்படும் பரிசோதனைகள் மூலம் சில குறைபாடுகளை முன்கூட்டியே கண்டறிந்து சரியான முடிவுகளை எடுக்க முடியும்.
35 வயதுக்கு முன்பே கர்ப்பம் தரிப்பது, குரோமோசோம் தொடர்பான கோளாறுகளின் அபாயத்தைக் குறைக்க உதவும்.
குழந்தை மருத்துவ நிபுணர் டாக்டர் மூசா முகம்மது நூர்தீன் கருத்துப்படி, அமைச்சகம் குறிப்பிட்ட 45 விழுக்காடு பிறவிக் குறைபாடுகளில், முறையான முன்னெச்சரிக்கை நடவடிக்கைகள் மூலம் தவிர்க்கக்கூடிய அம்சங்கள் உள்ளன என்று வலியுறுத்துகிறார்.
