கோலாலம்பூர் | மார்ச் 26, 2026:
மத்திய கிழக்கில் நிலவி வரும் கடும் பதற்றங்களுக்கு இடையே, மலேசிய எண்ணெய் கப்பல் மற்றும் அதன் ஊழியர்கள் பாதுகாப்பாக தாயகம் திரும்புவதற்கு வழிவகை செய்த ஈரானுக்குப் பிரதமர் டத்தோஸ்ரீ அன்வார் இப்ராஹிம் தனது நன்றியைத் தெரிவித்துள்ளார்.
இது குறித்துப் பிரதமர் ஆற்றிய உரையில், மலேசியக் கப்பல் மற்றும் அதில் இருந்த பணியாளர்கள் எவ்வித பாதிப்புமின்றி பயணத்தைத் தொடர ஈரான் ஆரம்பத்திலேயே முழு ஒத்துழைப்பு வழங்கியது. இதற்காக ஈரான் அதிபர் மசூத் பெசெஷ்கியான் (Masoud Pezeshkian) அவர்களுக்குத் தனிப்பட்ட முறையில் நன்றியைத் தெரிவித்துக் கொள்கிறேன். அவர் வழங்கிய உடனடி அனுமதியால், தற்போது கப்பலை மீட்டெடுத்து ஊழியர்களைப் பாதுகாப்பாகத் தாயகம் கொண்டு வரும் பணிகள் இறுதிக்கட்டத்தில் உள்ளன என்றார்.
பிராந்தியத்தில் அமைதியை நிலைநாட்டவும், பதற்றத்தைக் குறைக்கவும் மலேசியா தொடர்ந்து உலகத் தலைவர்களுடன் பேச்சுவார்த்தை நடத்தி வருவதாக அன்வார் குறிப்பிட்டார். எனினும், கடந்த கால அனுபவங்கள் மற்றும் பாதுகாப்பு உத்தரவாதங்கள் இல்லாத காரணத்தால், ஈரான் போன்ற நாடுகள் பேச்சுவார்த்தைகளில் மிகுந்த எச்சரிக்கையுடன் இருப்பதாகவும் அவர் சுட்டிக்காட்டினார்.
மத்திய கிழக்கு போர் மற்றும் ஹார்முஸ் நீரிணை (Strait of Hormuz) பகுதியில் ஏற்பட்டுள்ள கட்டுப்பாடுகள் மலேசியாவிலும் தாக்கத்தை ஏற்படுத்தியுள்ளதாக அவர் கூறினார்: போர்ச் சூழலால் உலகளாவிய எண்ணெய் மற்றும் எரிவாயு விநியோகத்தில் தடைகள் ஏற்பட்டுள்ளன. இது மலேசியாவையும் பாதித்துள்ளது.
எனினும், நமது தேசிய எண்ணெய் நிறுவனமான பெட்ரோனாஸின் (Petronas) நீண்டகாலத் தரம் மற்றும் திறன்களால், மற்ற நாடுகளை விட மலேசியா ஓரளவு நிலையான சூழலில் இருப்பதாக அவர் நம்பிக்கை தெரிவித்தார்.
மலேசிய குடிமக்களின் நலனைப் பாதுகாப்பதிலும், நாட்டின் நலன்களை உறுதி செய்வதிலும் அரசாங்கம் எப்போதும் உறுதியாக இருக்கும் என்றும், அதே வேளையில் பிராந்திய ஸ்திரத்தன்மைக்காகத் தொடர்ந்து தூதரக ரீதியிலான முயற்சிகளை மேற்கொள்ளும் என்றும் பிரதமர் அன்வார் இப்ராஹிம் மீண்டும் வலியுறுத்தினார்.
