கோத்தா கினாபாலு | ஏப்ரல் 8, 2026
சபா மாநிலம், இனானாமில் உள்ள ஜாலான் கியோன்சோம் (Jalan Kionsom) பகுதியில் நேற்றிரவு நிகழ்ந்த சாலை விபத்தில், 50 வயது மதிக்கத்தக்க ஆடவர் ஒருவர் சம்பவ இடத்திலேயே உயிரிழந்தார். அவருடன் பயணித்த மற்றொருவர் பலத்த காயமடைந்துள்ளார்.
நேற்று இரவு சுமார் 11:30 மணியளவில் இந்த விபத்து நிகழ்ந்துள்ளது என்று, லிந்தாஸ் தீயணைப்பு மற்றும் மீட்பு நிலையத் தலைவர் நூர் ஷெரியானா பொஹாரி தெரிவித்துள்ளார்.
‘பெரோடுவா ஆக்சியா’ (Perodua Axia) ரக கார் ஒன்று, ஜாலான் கியோன்சோம் சாலையில் சென்றுகொண்டிருந்தபோது கட்டுப்பாட்டை இழந்து, முன்னால் சென்றுகொண்டிருந்த ஒரு டிரெய்லர் லோரியின் பின்புறத்தில் பலமாக மோதியது.
விபத்து குறித்து அவசர அழைப்பு கிடைத்ததும், 10 வீரர்கள் அடங்கிய தீயணைப்புப் படை மீட்பு வாகனத்துடன் சம்பவ இடத்திற்கு விரைந்தது.
காரின் இடிபாடுகளுக்குள் சிக்கிக்கொண்ட இருவரையும் சிறப்பு உபகரணங்களைப் பயன்படுத்தித் தீயணைப்பு வீரர்கள் மீட்டனர்.
காரில் பயணித்த 50 வயது மதிக்கத்தக்க நபர் ஏற்கனவே உயிரிழந்துவிட்டதை மருத்துவக் குழுவினர் உறுதி செய்தனர். பலத்த காயமடைந்த 41 வயதுடைய மற்றொரு நபர் உடனடியாக குவீன் எலிசபெத் I மருத்துவமனைக்குக் கொண்டு செல்லப்பட்டார்.
இந்நேரம் 33 வயதுடைய டிரெய்லர் லோரி ஓட்டுநர் எவ்விதக் காயமுமின்றி உயிர் தப்பினார்.
உயிரிழந்தவரின் உடல் மேலதிக நடவடிக்கைக்காகக் காவல்துறையிடம் ஒப்படைக்கப்பட்டுள்ளது. அதிகாலை 12:50 மணியளவில் விபத்து நடந்த பகுதி சீர் செய்யப்பட்டு, போக்குவரத்து வழமைக்குத் திரும்பியது.
