கோலா திரெங்கானு:
திரெங்கானு, சுங்கை ஜெராம் உலு (Sungai Jeram Hulu) ஆற்றில் குளித்துக் கொண்டிருந்தபோது காணாமல் போன இரண்டு சகோதரிகள், இன்று மாலை சடலமாக மீட்கப்பட்டனர்.
பலியானவர்கள் கம்போங் ஜெராம் பகுதியைச் சேர்ந்த நூர் அபிகா ஷாஹிரா முகமட் ஷாவாலுடின் (வயது 15) மற்றும் அவரது தங்கை நூர் ஷகிலா ஷாஹிரா அஸ்மான் (வயது 12) என அடையாளம் காணப்பட்டுள்ளனர்.
மாலை சுமார் 6:00 மணியளவில், நீர் மீட்புக் குழுவினரால் (PPDA) இவர்களது உடல்கள் கண்டெடுக்கப்பட்டதாக திரெங்கானு தீயணைப்பு மற்றும் மீட்புத் துறையின் (JBPM) அதிகாரி பஹாரும் ஹாசிம் கூறினார்.
சம்பவம் நடந்த இடத்திலிருந்து சுமார் 20 மீட்டர் தொலைவில், 4 மீட்டர் ஆழத்தில் ஆற்றின் அடிப்பகுதியில் உடல்கள் கண்டறியப்பட்டன என்றும், ஆற்றில் நிலவிய பலத்த நீரோட்டம் மற்றும் ஓதங்களின் (High tide) காரணமாக, உடல்களை மீட்க சுமார் 3 மணிநேரம் போராட்ட வேண்டியிருந்தது என்றும் அவர் சொன்னார்.
இந்த தேடுதல் பணியில் கோலா திரெங்கானு மற்றும் கோலா நெருஸ் நிலையங்களைச் சேர்ந்த 14 வீரர்கள் ஈடுபட்டனர்.
தற்போது உயிரிழந்தவர்களின் உடல்கள் பிரேதப் பரிசோதனைக்காக சுல்தான் சைனல் அபிடின் மருத்துவமனைக்கு (HoSZA) கொண்டு செல்லப்பட்டுள்ளன.
இந்த விபத்து குறித்து கருத்து தெரிவித்த உயிரிழந்த சிறுமிகளின் பாட்டி ஏசா சாலி (76), தனது பேத்திகளின் மறைவு பேரிழப்பாக இருந்தாலும், அவர்களது உடல்கள் விரைவாகக் கண்டுபிடிக்கப்பட்டது ஆறுதல் அளிப்பதாகக் கூறினார்.
சிறுமிகளின் தாயார் சூரியா சுலோங் (34) ஒரு மாற்றுத்திறனாளி (Intellectual impairment) என்பதால், தனது பிள்ளைகளின் மறைவை உணர்ந்து கொள்ள முடியாமல் திகைத்துப் போயுள்ளதாக ஏசா கண்ணீருடன் தெரிவித்தார். உயிரிழந்த மூத்த சகோதரி அபிகாவும் ஒரு சிறப்புப் பள்ளி மாணவி என்பது குறிப்பிடத்தக்கது.
இந்தத் துயரச் சம்பவம் அப்பகுதியில் பெரும் சோகத்தை ஏற்படுத்தியுள்ளது.
