மீரி:
சரவாக், மீரி பகுதியில் தாயையும் அவரது பச்சிளம் குழந்தையையும் கத்திமுனையில் மிரட்டி ‘டொயோட்டா ஃபார்ச்சூனர்’ (Toyota Fortuner) ரகச் சொகுசு காரைக் கடத்திச் சென்ற வழக்கில், முக்கியச் சந்தேக நபர் ஒருவரைப் போலீசார் 24 மணி நேரத்திற்குள் அதிரடியாகக் கைது செய்துள்ளனர்.
கடந்த ஞாயிற்றுக்கிழமை (மே 17) காலை 9.15 மணியளவில், பாதிக்கப்பட்ட தாய் தனது குழந்தையுடன் காரில் காத்துக் கொண்டிருந்தபோது இச்சம்பவம் நிகழ்ந்துள்ளது. அங்கு வந்த அடையாளம் தெரியாத இரு கொள்ளையர்கள், திடீரென தாயின் கழுத்திலும் பச்சிளம் குழந்தையின் கழுத்திலும் கத்தியை வைத்து மிரட்டியுள்ளனர் என்று, மீரி மாவட்ட காவல்துறைத் தலைவர் உதவி ஆணையர் (ACP) முகமட் ஃபர்ஹான் லீ அப்துல்லா வெளியிட்டுள்ள ஓர் அறிக்கையில் தெரிவித்துள்ளார்.
அவர்களைத் மிரட்டி காரைக் கடத்திய கும்பல், பின்னர் மீரி பூங்கா (Miri Park) பகுதிக்கு அருகே தாயையும் குழந்தையையும் காரில் இருந்து வலுக்கட்டாயமாக இறக்கிவிட்டு, காரோடு தப்பியோடியுள்ளது. இந்தச் சம்பவத்தில் கடத்தப்பட்ட சொகுசு வாகனத்தின் மதிப்பு உட்பட மொத்தம் 170,600 ரிங்கிட் இழப்பு ஏற்பட்டதாகப் புகார் அளிக்கப்பட்டது.
புகார் கிடைத்த உடனே தனிப்படை அமைத்து விசாரணையை முடுக்கிவிட்ட போலீசார், அடுத்த 24 மணி நேரத்திற்குள் ‘டைம்ஸ் ஸ்கொயர்’ (Times Square) பகுதியில் வைத்து 50 வயதுடைய முக்கியச் சந்தேக நபரைக் கைது செய்தனர். மேலும், அவரிடமிருந்து கடத்தப்பட்ட டொயோட்டா ஃபார்ச்சூனர் காரையும் போலீசார் பத்திரமாக மீட்டனர்.
கைது செய்யப்பட்ட அந்த 50 வயது நபருக்கு ஏற்கனவே பல பழைய குற்றப் பின்னணிகள் (Criminal Records) இருப்பது விசாரணையில் தெரியவந்துள்ளது.
நீதிமன்ற உத்தரவின்படி, கைதான சந்தேக நபர் வரும் மே 24-ஆம் தேதி வரை 6 நாட்களுக்குப் போலீஸ் காவலில் (Remand) வைக்கப்பட்டு தீவிர விசாரணைக்கு உட்படுத்தப்பட்டுள்ளார். மேலும், இக்கொள்ளைச் சம்பவத்தில் ஈடுபட்டுத் தப்பியோடிய மற்றொரு குற்றவாளியைப் போலீசார் தீவிரமாகத் தேடி வருகின்றனர்.
பொதுமக்கள் நடமாட்டம் மிகுந்த காலை வேளையில், குழந்தையைக் கத்திமுனையில் மிரட்டி நடந்த இந்தத் துணிகரக் கொள்ளைச் சம்பவம் மீரி பகுதியில் பெரும் பரபரப்பை ஏற்படுத்தியுள்ளது.
