பெரிக்காத்தான் நேஷனல் (PN) தலைவர் அஹ்மத் சம்சூரி மொக்தாரின் ஒப்புதல் இல்லாமல் கூட்டணியின் பெயரில் எந்த நிகழ்ச்சியோ அல்லது கூட்டமோ ஏற்பாடு செய்ய முடியாது என்று பெரிக்காத்தான் நேஷனல் தலைவர் ஒருவர் கூறினார். கூட்டணியின் தலைமை மாற்றத்தை சங்கங்களின் பதிவாளர் ஏற்றுக்கொண்டுள்ளார் என்று பிஎன் பொதுச் செயலாளர் தக்கியுதீன் ஹசன் கூறினார். பெர்லிஸ் அரசியல் நெருக்கடியைத் தொடர்ந்து ஜனவரி 1 அன்று ராஜினாமா செய்த பெர்சத்து தலைவர் முஹிடின் யாசினுக்குப் பதிலாக, பிப்ரவரியில் சம்சூரி பெரிக்காத்தான் தலைவராக நியமிக்கப்பட்டார்.
பிப்ரவரி 22 அன்று நடைபெற்ற கூட்டணியின் சிறப்பு உச்ச மன்றக் கூட்டத்தின் குறிப்புகள் பெறப்பட்டதை, சங்கங்களின் பதிவாளர் ஜூன் 19 தேதியிட்ட கடிதத்தில் தனக்கு உறுதிப்படுத்தியதாக தக்கியுதீன் கூறினார்.பெரிக்காத்தான் தலைவர் பதவியில் இருந்து முஹைதீன் ராஜினாமா செய்வதற்கும், அப்பதவிக்கு சம்சுரி நியமிக்கப்படுவதற்கும் உச்ச மன்றம் ஒப்புதல் அளித்ததையும் சங்கங்களின் பதிவாளர் கவனத்தில் எடுத்துக்கொண்டார். மார்ச் 14 அன்று நடைபெற்ற பெரிக்காத்தானின் முதல் உச்ச மன்றக் கூட்டத்தின் செயல் குறிப்புகள், கூட்டணியின் புதுப்பிக்கப்பட்ட தலைமை வரிசை மற்றும் அதன் உச்ச மன்றக் குழுவிற்கான நியமனங்கள் ஆகியவை பெறப்பட்டதையும் அது உறுதி செய்தது.
எனவே, சம்சூரியின் அனுமதியின்றி பெரிகாத்தான் நேஷனல் பதாகையின் கீழ் எந்தவொரு நிகழ்ச்சியோ அல்லது கூட்டமோ நடத்தப்பட முடியாது என்று தக்கியுதீன் ஒரு அறிக்கையில் கூறினார். பெர்சத்து மற்றும் பாஸ் கட்சிகளுக்கு இடையே நடந்து வரும் மோதலுக்கு மத்தியில், இன்று பெர்சத்து தலைமையகத்தில் பெரிக்காத்தான் உச்ச மன்றக் கூட்டத்தைக் கூட்ட முஹிடின் முயன்றதாக வந்த செய்திகளுக்கு அவர் பதிலளித்தார். அதன்பிறகு, பெர்சத்து பொதுச் செயலாளர் அஸ்மின் அலி அந்தச் செய்தியை நிராகரித்து, அது ஒரு போலிச் செய்தி என்று மலேசியா கெசட் பத்திரிகைக்குத் தெரிவித்தார்.
