கோலாலம்பூர்:
கெப்போங் பகுதியில் உள்ள வீடொன்றிற்குள் அத்துமீறி நுழைந்து, அங்கிருந்த உடன்பிறந்த இருவரைக் கத்தியால் குத்திக் காயப்படுத்திய குற்றச்சாட்டில் கைது செய்யப்பட்ட வெளிநாட்டு நபர் ஒருவரை 7 நாட்கள் விளக்கப்பட்ட காவலில் வைக்க நீதிமன்றம் உத்தரவிட்டுள்ளது.
கடந்த செப்டம்பர் 29-ஆம் திகதி அதிகாலை 5.04 மணியளவில், தாமான் ஸ்ரீ பிந்தாங் பகுதியில் உள்ள வீடொன்றிற்குள் நபர் ஒருவர் அத்துமீறி நுழைந்துள்ளதாகப் போலீசாருக்குத் தகவல் கிடைத்தது.
சம்பவ இடத்திற்குச் சென்ற போலீசார், வீட்டின் வெளிப்புறத்தில் தீப்பற்றிய தடயங்களைக் கண்டதுடன், கத்திக் குத்துக்காயங்களுடன் கீழ் தளத்தின் கழிப்பறையில் ஒளிந்திருந்த சகோதரன் மற்றும் சகோதரியை மீட்டனர்.
வீட்டின் மேல் தளத்தில் கத்தியுடன் இருந்த சந்தேகநபரான வெளிநாட்டு நபரைப் போலீசார் அதிரடியாகக் கைது செய்தனர். காயமடைந்த சகோதரர்கள் இருவரும், காயங்களுக்கு உள்ளாகியிருந்த சந்தேகநபரும் மேலதிக சிகிச்சைகளுக்காகக் கோலாலம்பூர் வைத்தியசாலையில் அனுமதிக்கப்பட்டுள்ளனர்.
செப்டம்பர் 30 முதல் அக்டோபர் 7 வரை சந்தேகநபரைத் தடுப்புக் காவலில் வைத்து விசாரிக்க அனுமதி பெறப்பட்டுள்ளதாகச் செந்தூல் மாவட்ட போலிஸ் தலைமை உதவி ஆணையர் தெரிவித்துள்ளார். இதுவரை 5 சாட்சிகளிடம் வாக்குமூலங்கள் பெறப்பட்டுள்ளதுடன், பாதிக்கப்பட்டவர்களிடமும் மேலதிக வாக்குமூலங்கள் பெறப்பட்டு வருகின்றன.
இச்சம்பவம் தொடர்பில் அபாயகரமான ஆயுதங்களால் கடுமையான காயங்களை ஏற்படுத்துதல் (Section 326) மற்றும் தீ வைப்புச் சேதம் விளைவித்தல் (Section 435) ஆகிய குற்றவியல் பிரிவுகளின் கீழ் பொலிஸார் தீவிர விசாரணைகளை மேற்கொண்டு வருகின்றனர்.
