கோலாலம்பூர்:
இன்று பகல் 12.10 மணியளவில் தெமர்லோ அருகே கிழக்கு கடற்கரை விரைவுச்சாலையின் (East Coast Expressway) KM119.5 பிரிவில் இந்த விபத்து நிகழ்ந்தது.
லோரி ஒன்றின் இடது பக்க பின் டயர் பஞ்சரானதால், 35 வயதுடைய ஓட்டுநர் தனது லோரியை நெடுஞ்சாலையின் அவசர வழியில் (Emergency Lane) நிறுத்தியிருந்தார்.
பஞ்சரான டயரை மாற்றுவதற்காக 48 வயதான மெக்கானிக் ஒருவர் வரவழைக்கப்பட்டார். அவர் லோரியின் வலது பக்கத்தில் அமர்ந்து டயர்களைப் பரிசோதித்துக் கொண்டிருந்தபோது, அதே திசையில் வந்த 3 டன்கொண்ட மற்றுமொரு லோரி, நிறுத்தப்பட்டிருந்த லோரியின் மீது மோதியது.
இந்த மோதலில் அந்த மெக்கானிக் மீது லோரி மோதியதில், அவர் பலத்த காயமடைந்து சம்பவ இடத்திலேயே உயிரிழந்தார்.
விபத்தை ஏற்படுத்திய 36 வயது லோரி ஓட்டுநர் கைது செய்யப்பட்டுள்ளார். அவருக்கு மேற்கொள்ளப்பட்ட சிறுநீர் பரிசோதனையில் போதைப்பொருள் அல்லது மது அருந்தியதற்கான ஆதாரங்கள் இல்லை (Negative) எனத் தெரியவந்தது.
இந்த வழக்கு சாலைப் போக்குவரத்துச் சட்டம் 1987-ன் பிரிவு 41(1)-ன் கீழ் (அலட்சியமாக வாகனம் ஓட்டி மரணத்தை விளைவித்தல்) விசாரிக்கப்படுகிறது.
இக்குற்றம் நிரூபிக்கப்பட்டால் அதிகபட்சமாக 10 ஆண்டுகள் சிறைத்தண்டனை, RM50,000 வரை அபராதம் மற்றும் ஓட்டுநர் உரிமம் இடைநீக்கம் செய்யப்பட வாய்ப்புள்ளது.
விபத்தை ஏற்படுத்திய லோரி சாலையோரம் இருந்த வடிகாலில் விழுந்து நின்றது. உயிரிழந்த மெக்கானிக்கின் உடல் பிரேதப் பரிசோதனைக்காக சுல்தான் ஹாஜி அஹ்மத் ஷா மருத்துவமனைக்கு அனுப்பி வைக்கப்பட்டுள்ளது.
இரு லோரி ஓட்டுநர்களும் காயமின்றி உயிர் தப்பினர் என்பது குறிப்பிடத்தக்கது.
