ஜார்ஜ் டவுன்:
பினாங்கு மாநிலத்தின் மருத்துவ சுற்றுலாத் துறை கடந்த 2025-ஆம் ஆண்டில் முன்னெப்போதும் இல்லாத வகையில் வலுவான வளர்ச்சியைப் பதிவு செய்துள்ளது.
இத்துறையின் மூலம் ஈட்டப்பட்ட வருவாய் 1.13 பில்லியன் ரிங்கிட்டைத் தாண்டியுள்ளது என்று, மாநில சட்டமன்றத்தில் இன்று பத்து லங்காங் தொகுதி சட்டமன்ற உறுப்பினர் ஓங் ஆ தியோங்கின் கேள்விக்குப் பதிலளித்த சுற்றுலா மற்றும் ஆக்கப்பூர்வ பொருளாதாரத்திற்கான மாநில நிர்வாக கவுன்சிலர் வோங் ஹான் வாய், இத்தகவலை வெளியிட்டார்.
2024-இல் 4,18,608 ஆக இருந்த வெளிநாட்டு நோயாளிகளின் எண்ணிக்கை, 2025-இல் 5,27,176 ஆக உயர்ந்துள்ளது. இது 25.94% வளர்ச்சியாகும்.
2024-இல் RM898.07 மில்லியனாக இருந்த வருவாய், 2025-இல் RM1.136 பில்லியனாக அதிகரித்துள்ளது. இது ஓராண்டில் ஈட்டப்பட்ட 26.6% வருவாய் வளர்ச்சியைக் காட்டுகிறது.
துறையை வலுப்படுத்த புதிய உத்திகள்:
2026-ஆம் ஆண்டின் ‘மலேசிய மருத்துவ சுற்றுலா ஆண்டை’ (MYMT) முன்னிட்டு, இத்துறையை உலகளவில் மேம்படுத்த மாநில அரசு பல்வேறு சிறப்புத் திட்டங்களை வகுத்துள்ளது:
1. விமான நிறுவனங்களுடன் கூட்டணி: ஏர்ஏசியா போன்ற நிறுவனங்களுடன் இணைந்து ‘போர்டிங் பாஸ் சலுகைகள்’ திட்டம் செயல்படுத்தப்படுகிறது. இதன் மூலம், வெளிநாட்டு கடவுச்சீட்டு மற்றும் போர்டிங் பாஸ் வைத்திருக்கும் பயணிகள் சுகாதாரப் பரிசோதனைத் தொகுப்புகளுக்கு (Health Screening Packages) 15% தள்ளுபடி பெறலாம்.
2. எளிதான பணப் பரிமாற்றம்: வெளிநாட்டு நோயாளிகளின் வசதிக்காக, குறிப்பாக இந்தோனேசிய நோயாளிகளுக்காக ‘QRIS’ குறியீடு மூலம் பணம் செலுத்தும் முறை அறிமுகப்படுத்தப்பட்டுள்ளது. இது நோயாளிகள் தங்களது தாய்நாட்டு நாணயத்திலேயே கட்டணத்தைச் செலுத்தவும், குறைந்த அந்நியச் செலாவணி விகிதங்களைப் பெறவும் வழிவகுக்கிறது.
3. சர்வதேச விளம்பரங்கள்: சீனா, இந்தோனேசியா, சிங்கப்பூர், தைவான் மற்றும் மியான்மர் போன்ற நாடுகளில் பினாங்கு மருத்துவ சுற்றுலாவைத் தீவிரமாக ஊக்குவிக்க பினாங்கு குளோபல் டூரிசம் மற்றும் மலேசியா ஹெல்த்கேர் டிராவல் கவுன்சில் ஆகிய அமைப்புகள் இணைந்து செயல்பட்டு வருகின்றன.
பினாங்கில் உள்ள 16 முன்னணி தனியார் மருத்துவமனைகளை உள்ளடக்கிய ‘பினாங்கு மருத்துவ சுற்றுலா மையத்தின்’ (PMED) சிறப்பான செயல்பாடுகளே இந்த வளர்ச்சிக்கு முக்கியக் காரணம் என வோங் ஹான் வாய் பாராட்டு தெரிவித்தார்.
