கோலாலம்பூர்:
பினாங்கு மாநிலத்தில் போதைப் பொருள் குற்றப் புலனாய்வுத் துறையினர் (NCID) மேற்கொண்ட மூன்று வெவ்வேறு அதிரடி நடவடிக்கைகளில், RM3.44 மில்லியன் மதிப்புள்ள பலவகை போதைப் பொருள்களைப் பறிமுதல் செய்ததோடு, கணவன்-மனைவி உட்பட 5 பேரைக் கைது செய்துள்ளனர்.
கடந்த செப்டம்பர் 21 முதல் செப்டம்பர் 27 வரை நடத்தப்பட்ட இந்தச் சோதனைகளில் 8.83 கிலோ கிராம் ஹெராயின், 15.06 கிலோ கிராம் எக்ஸ்டசி (MDMA) பவுடர், 5 லிட்டர் திரவ வடிவிலான எக்ஸ்டசி, 182 எக்ஸ்டசி மாத்திரைகள் மற்றும் கெட்டமைன் போன்றவை பறிமுதல் செய்யப்பட்டுள்ளதாகப் பினாங்கு மாநிலக் காவல் துறைத் தலைவர் டத்தோ டெனிஸ் லிம் குவாங் கெங் தெரிவித்தார்.
“கைது செய்யப்பட்ட ஐந்து நபர்களும் கடந்த ஜூலை மாதம் முதல் பினாங்கு மாநிலத்தில் போதைப் பொருள் கடத்தலில் தீவிரமாக ஈடுபட்டு வந்தது முதற்கட்ட விசாரணையில் தெரியவந்துள்ளது. இவர்கள் தனித்தனி குழுக்களாகச் செயல்பட்டு வந்துள்ளனர். மேலும், சோதனைகளின் போது கடத்தலுக்குப் பயன்படுத்தப்பட்ட RM58,000 மதிப்பிலான 6 வாகனங்களும் பறிமுதல் செய்யப்பட்டுள்ளதாக ” பினாங்கு மாநிலக் காவல் துறைத் தலைவர், டத்தோ டெனிஸ் லிம் குவாங் கெங் கூறினார்
முதல் சோதனையில், ஜாலான் மஸ்ஜிட் நெகரியில் 47 வயது நபர் கைது செய்யப்பட்டு, அவர் காரில் மறைத்து வைத்திருந்த RM443,518 மதிப்பிலான ஹெராயின் மற்றும் போதைப் பொருள் தயாரிப்பு உபகரணங்கள் பறிமுதல் செய்யப்பட்டன.
இரண்டாவது சோதனையில், ஜாலான் துன் டாக்டர் அவாங் மற்றும் சுங்கை நிபோங் கெச்சில் பகுதிகளில் கேளிக்கை விடுதிகளில் பணிபுரியும் தம்பதி உட்பட மூவர் கைது செய்யப்பட்டு, அவர்களிடமிருந்து RM1.2 மில்லியன் மதிப்புள்ள திரவ மற்றும் பவுடர் வடிவ எக்ஸ்டசி போதைப் பொருள்கள் கைப்பற்றப்பட்டன.
மூன்றாவது நடவடிக்கையாக, புக்கிட் மெர்தாஜாம் பகுதியில் 45 வயது நபரின் காரில் இருந்து RM1.8 மில்லியன் மதிப்பிலான எக்ஸ்டசி மற்றும் கெட்டமைன் போதைப் பொருள்கள் பறிமுதல் செய்யப்பட்டன. கைதான ஐந்து சந்தேகநபர்களும் 7 நாட்கள் தடுப்புக் காவலில் வைக்கப்பட்டு, 1952-ஆம் ஆண்டின் அபாயகரமான போதைப்பொருள்கள் சட்டத்தின் பிரிவு 39B-இன் கீழ் தீவிர விசாரணைக்கு உட்படுத்தப்பட்டு வருகின்றனர்.
