அலோர் ஸ்டார், நவம்பர் 30 :
கடந்த மூன்று ஆண்டுகளில் கெடா மாநிலத்தில் மொத்தம் 102 சட்டவிரோத குப்பை இடங்கள் கண்டறியப்பட்டுள்ளன, அவற்றில் பெரும்பாலானவை சுங்கைப் பட்டாணி மற்றும் கூலிமில் உள்ள தொழில்துறை பகுதிகளுக்கு அருகில் உள்ளன என்று கெடா திடக்கழிவு மேலாண்மை மற்றும் பொது சுத்திகரிப்பு கழகத்தின் (SWCorp) இயக்குநர் நோர்டின் அமாட் தெரிவித்தார்.
சட்டவிரோத குப்பைகள் இருக்கும் இடத்தில் கட்டுமானக் கழிவுகள், வீட்டுக் கழிவுகள் மற்றும் சில இடங்களில் மின்னணுக் கழிவுகள் (E-waste) ஆகியவையும் அடங்கும் என்று அவர் கூறினார். இவற்றில் மொத்தம் 59 இடங்கள் மூடப்பட்டுள்ளன, ஏனைய 43 இடங்கள் இன்னும் செயலில் உள்ளன என்று அவர் கூறினார்.
“மொத்தம் எட்டு சட்டவிரோத குப்பை கொட்டும் இடங்கள் சம்மந்தப்பட்ட வழக்குகள் நீதிமன்றத்திற்கு கொண்டு வரப்பட்டன, அவற்றில் ஆறு வழக்குகளுக்கு RM10,000 முதல் RM30,000 வரையிலான அபராதம் உள்ளிட்ட குற்றங்களுக்காக நீதிமன்றம் தண்டனை விதித்தது.
“இதுவரை, நாங்கள் மேலும் 10 விசாரணை ஆவணங்களைத் தயாரித்து வருகிறோம், மேலும் இதுதொடர்பான வழக்குத் தொடர வீட்டுவசதி மற்றும் உள்ளாட்சி அமைச்சகத்தின் (KPKT) துணை அரசு வழக்கறிஞரின் அனுமதிக்காக காத்திருக்கிறோம்,” என்று அவர் கூறினார்.
இங்குள்ள விஸ்மா தாருல் அமானில் மாநில அளவிலான தேசிய மறுசுழற்சி தினமான 2021-ஐ ஒட்டி, ‘உலக தூய்மை நாள்’ (WCD) கொண்டாட்டம் மற்றும் பள்ளிகளின் மறுசுழற்சி போட்டிக்கான பரிசுகள் (Perkiss) வழங்கல் ஆகியவற்றுடன் இணைந்து இன்று நடந்த பாராட்டு விழாவில் கலந்துகொண்ட பிறகு அவர் இவ்வாறு கூறினார்.
மேலும் மாநில சுகாதாரம் மற்றும் உள்ளாட்சிக் குழுவின் தலைவரான டத்தோ டாக்டர் முகமட் ஹயாதி ஓத்மான் இந்த விழாவில் கலந்து கொண்டார்.
SWCorp இன் அமலாக்க உதவியாளர்கள் மூலம் அவரது துறையினர், கழிவுகள் கொட்டப்படாமல் இருப்பதை உறுதி செய்வதற்காக செயலிலுள்ள 43 சட்டவிரோத குப்பை கொட்டும் இடங்களை எப்போதும் கண்காணித்து வருகிறது.
மேலும், சட்டவிரோதமாக குப்பை கொட்டும் இடங்களில் பொதுமக்கள் குப்பைகளை கொட்டாமல் இருக்க, அங்கு எச்சரிக்கை பதாகைகள் வைக்கப்பட்டுள்ளன என்றும் நோர்டின் கூறினார்.
