கோலாலம்பூர், ஜூன் 3 :
நகரப்பகுதியில் சீரான போக்குவரத்தை உறுதிப்படுத்தும் வகையில், 7,500 கிலோவுக்கு மேல் எடையுள்ள (BDM) கனரக வாகனங்கள் அல்லது சரக்கு வாகனங்கள், நகரின் மையப்பகுதிக்குள் தினமும் காலை 6.30 மணி முதல் 9.30 மணி மற்றும் மாலை 4.30 மணி முதல் இரவு 7.30 மணிவரை முக்கிய சாலைகளில் நுழைவதற்கு சாலைப் போக்குவரத்துத் துறை தடை விதித்துள்ளது.
நெரிசல் நேரங்களில், அதாவது காலை மற்றும் மாலை நேரங்களில் நகருக்குள் கனரக வாகனங்கள் நுழைவதைக் காட்டும் சாலைப் போக்குவரத்துத் துறையின் கண்காணிப்பைத் தொடர்ந்து, இந்த தடையானது அமல்படுத்தப்பட்டது.
“நகர மையத்தில் இருந்து குறைந்தபட்சம் ஐந்து கிமீ பயணக் கட்டுப்பாடுகளுடன் கூடிய வர்த்தமானியில் உள்ள சாலைகள், நகர மையத்தின் நுழைவாயிலில் தொடங்கி, நகர மையத்திற்குள் கனரக வாகனங்கள் நுழைவதைத் தடைசெய்யும் நேர அறிவிப்பு பலகை நிறுவப்படும்” என்று சாலைப் போக்குவரத்துத் துறை வியாழக்கிழமை (ஜூன் 2) வெளியிட்ட ஒரு அறிக்கையில் தெரிவித்துள்ளது.
மேலும், நகரின் முக்கிய சாலைகளில் சரக்கு வாகனங்கள் நுழைய தடை நீண்ட காலமாக நடைமுறையில் இருந்து வருகிறது, இருப்பினும், கோவிட்-19 தாக்கத்திலிருந்து நாடு இறுதி நிலைக்கு மாறியதில் இருந்து, கனரக வாகன ஓட்டிகள் இந்த விதியை புறக்கணித்து வருகின்றனர் என்று அந்த அறிக்கையில் அது தெரிவித்திருந்தது.
“இவ்விதியை புறக்கணித்தால் JPJ RM300-க்கு மிகாமல் அபராதம் விதிக்கப்படலாம் அல்லது நீதிமன்றத்தால் விதிக்கப்படும் அபராதம் RM300-க்கும் குறையாமலும் RM2,000 க்கு மிகாமல் இருக்கும்” என்று தெரிவித்துள்ளது.
