வீடு கட்டித் தருவதாக கூறி ஆசிரியை ஒருவரிடம் RM56,400 மோசடி செய்த குற்றச்சாட்டில், ஒப்பந்ததாரர் ஒருவர் மீது இன்று சிரம்பான் மாவட்ட நீதிமன்றத்தில் குற்றம் சாட்டப்பட்டது.
குற்றம் சாட்டப்பட்ட 35 வயதான ஜாஹிதிர் ஜைனுல் என்பவருக்கு எதிரான குற்றச்சாட்டு, மாவட்ட நீதிமன்ற நீதிபதி வி. வனிதா முன்னிலையில் வாசிக்கப்பட்ட பிறகு, அவர் குற்றத்தை ஒப்புக்கொண்டார்.
42 வயதான ஆசிரியையை குறித்த நபர் தன்னை ஒப்பந்ததாரர் என்று நம்ப வைத்து, ஏமாற்றி வீடு கட்ட பணத்தை பெற்றுக் கொண்டதாக அவர் மீது குற்றம் சாட்டப்பட்டது. மேலும், குறுகிய காலத்தில் வீடு கட்டித் தரப்படும் என்று பாதிக்கப்பட்ட பெண்ணிடம் வாக்குறுதி அளித்தும், அவர் அதைச் செய்யவில்லை என்று கூறப்பட்டது.
தாமான் பண்டார் செனவாங்கில் கடந்த ஆண்டு அக்டோபர் 26 முதல் டிசம்பர் 22 வரை அந்தக் குற்றத்தை செய்ததாக ஜாஹிதிர் மீது குற்றம் சாட்டப்பட்டது.
அவர் மீது குற்றவியல் சட்டத்தின் 417வது பிரிவின் கீழ் குற்றம் சாட்டப்பட்டது, இது குற்றம் நிரூபிக்கப்பட்டால் ஐந்து ஆண்டுகள் வரை சிறைத்தண்டனை, அபராதம் அல்லது இரண்டுமே விதிக்கப்படலாம்.
இதுதவிர, குற்றம் சாட்டப்பட்டவர் அதே நீதிமன்றத்தில் தங்கச் சங்கிலி மற்றும் பதக்கத்தைத் திருடுவதற்காக ஒரு வீட்டிற்குள் நுழைந்த இரண்டாவது குற்றச்சாட்டையும் அவர் ஒப்புக்கொண்டார்.
ஏப்ரல் 3 ஆம் தேதி இங்கு அருகிலுள்ள தாமான் பெனாகா மேவாவில், மாலை 5.45 மணியளவில் அவர் அந்தக் குற்றத்தைச் செய்ததாக குற்றம் சாட்டப்பட்டது.
இது குற்றவியல் சட்டத்தின் 457வது பிரிவின் கீழ் குற்றச்சாட்டு வந்தது. குற்றம் நிரூபிக்கப்பட்டால் ஐந்து ஆண்டுகள் வரை சிறைத்தண்டனையும் அபராதமும் விதிக்கப்படலாம். ஆனால் திருட்டு தொடர்பான குற்றமாக இருந்தால், குற்றவாளிக்கு 14 ஆண்டுகள் வரை சிறைத்தண்டனை விதிக்கப்படலாம் என்றும் விதி கூறுகிறது.
இவ்வழக்கில் ஒவ்வொரு குற்றத்திற்கும் RM5,000 ஜாமீன் நிர்ணயித்தது மற்றும் தண்டனை வழங்க மே 25ஆம் தேதியை நீதிமன்றம் நிர்ணயித்தது.
