கோலாலம்பூர்: பிரதமர் டத்தோஸ்ரீ அன்வார் இப்ராஹிமுக்கு எதிராக இன்று காலை முதல் சமூக வலைதளங்களில் வெளியான கொலை மிரட்டல்கள் குறித்து போலீசார் விசாரணை நடத்தி வருகின்றனர். போலீஸ் படைத்தலைவர் டான்ஸ்ரீ ரஸாருதீன் ஹுசைனை தொடர்பு கொண்டபோது, இந்த விவகாரம் குறித்து இதுவரை ஒரு அறிக்கை கிடைத்துள்ளதாகவும், வழக்கு குறித்த கூடுதல் விவரங்கள் அவ்வப்போது அறிவிக்கப்படும் என்றும் கூறினார்.
இன்று முன்னதாக, டிக்டோக் வீடியோவின் ஸ்கிரீன் ஷாட் சமூக ஊடகங்களில் வைரலானது. அங்கு ஒரு பயனர் பிரதமர், அமைச்சர்கள் மற்றும் அரசியல் கட்சி உறுப்பினர்களை சுட்டுக் கொல்லும் எவருக்கும் RM5 மில்லியனை வழங்குவதாகக் கூறினார். ஆனால் அந்த வீடியோ அகற்றப்பட்டது. குற்றவியல் சட்டம் 507 மற்றும் 233 ஆகிய பிரிவுகளின் கீழ் இந்த வழக்கு விசாரிக்கப்பட்டு வருவதாக ரஸாருதீன் கூறினார். இதற்கிடையில், பிகேஆர் இளைஞரணி துணைத் தலைவர் முஹம்மது கமில் அப்துல் முனிம் கூறுகையில், புத்ராஜெயா பிரிவின் பிரதிநிதிகள் இன்று பிற்பகல் 1.43 மணிக்கு புத்ராஜெயா மாவட்ட காவல்துறை தலைமையகத்தில் வீடியோ குறித்த புகாரினை அளித்தனர்.
ஜெயதானி89 என்ற கணக்குப் பயனரால் TikTok இல் பதிவேற்றப்பட்ட காணொளியில் பிரதமருக்கு (அன்வார்) எதிரான அச்சுறுத்தல்கள் உள்ளன. அவரைக் கொலை செய்பவருக்கு RM5 மில்லியன் வழங்கப்படும் என்று தெரிவித்திருந்ததாக அவர் புத்ராஜெயா அனைத்துலக மாநாட்டில் பிகேஆர் ஆண்டு தேசிய காங்கிரஸில் செய்தியாளர் கூட்டத்தில் கூறினார்.
நாட்டின் பாதுகாப்பு மற்றும் நல்லிணக்கத்திற்கு குந்தகம் விளைவிக்கும் இதுபோன்ற பொறுப்பற்ற நபர் மீது போலீசார் முழுமையான விசாரணை நடத்தி கடும் நடவடிக்கை எடுக்க வேண்டும் என்று முஹம்மது கமில் வலியுறுத்தினார். இதுபோன்ற சம்பவங்களைத் தடுக்காமல் விட்டுவிட்டால், மேலும் பொறுப்பற்ற நபர்கள் சுதந்திரமாக பொதுமக்களை கொலை மிரட்டல் விடுக்கும் வகையில் அறிக்கைகளை வெளியிடலாம். அதன் மூலம் தீவிரவாத செயல்கள் வளரும் என்றும் அவர் கவலை தெரிவித்தார்.
