ஜோகூர் பாரு,
ஜோகூர் உலு திராமில் உள்ள மலேசிய இராணுவப் போர் பயிற்சி மையமான புலாடாவில் (PULADA) பயிற்சியில் ஈடுபட்டிருந்த மலேசிய தொழில்நுட்பப் பல்கலைக்கழகத்தின் (UTM) ரிசர்வ் அதிகாரி பயிற்சி மாணவர் ஒருவர் உயிரிழந்த சம்பவம் தொடர்பாக விசாரணை நடத்த பாதுகாப்பு அமைச்சு விசேட குழுவை அமைத்துள்ளது.
இந்த குழுவில் பாதுகாப்பு அமைச்சுடன், உயர்கல்வி அமைச்சு மற்றும் உள்துறை அமைச்சின் பிரதிநிதிகளும் இடம் பெறுவார்கள் என்று பாதுகாப்பு அமைச்சர் டத்தோஸ்ரீ முகமது காலிட் நோர்டின் தெரிவித்தார்.
“மரணமான மாணவர் மீது பிரேத பரிசோதனை செய்யப்பட்டதாக எனக்கு தெரிவிக்கப்பட்டுள்ளது. ஆனால் முடிவுகள் இன்னும் கிடைக்கவில்லை. இருப்பினும், அவர் மரணித்த சூழ்நிலைகள் மற்றும் காரணங்களை ஆய்வு செய்ய நாங்கள் ஏற்கனவே ஒரு குழுவை அமைத்துள்ளோம்,” என அவர் கூறினார்.
இங்கு தாமான் மாவார் பகுதியில் நடைபெற்ற பாசீர் கூடாங் அம்னோ பிரிவு பேராளர் கூட்டத்தில் கலந்து கொண்ட பின்னர் அவர் செய்தியாளர்களிடம் பேசினார்.
முன்னதாக, மாணவரின் தாயார் உம்மு ஹைமான் டவுலாட்கான் (வயது 45) தனது மகன் ஷியாம்சுல் ஹாரிஸ் சம்சுடின் உடலில் கடுமையான சிராய்ப்பு காயங்கள் இருந்ததாக காவல்துறையில் புகார் அளித்ததாக ஒரு இணையதளம் செய்தி வெளியிட்டது.
இந்நிலையில், கோத்தா திங்கி மாவட்ட காவல்துறைத் தலைவர் சூப்ரிண்டெண்டன் யூசோப் ஒத்மான், மாணவர் மரணத்தில் எந்தவொரு குற்றவியல் கூறுகளும் இதுவரை கண்டறியப்படவில்லை என நேற்று உறுதிப்படுத்தினார்.
இந்த சம்பவம் குறித்து கடந்த ஜூலை 28ஆம் தேதி மாலை 5.33 மணிக்கு காவல்துறைக்கு தகவல் கிடைத்தது. அதே நாள் பிற்பகல் 2.30 மணியளவில் புலாடாவில் இடம்பெற்ற போர்ப் பயிற்சியில் மாணவர் ஒருவேளை கட்டுப்பாட்டை இழந்து, சாராம்சமற்ற வார்த்தைகளை பேசியதாக முதற்கட்ட விசாரணையில் தெரியவந்தது.
உடனடியாக அவர் கோத்தா திங்கி மருத்துவமனைக்கு அழைத்துச் செல்லப்பட்டார். ஆனால் அவசர சிகிச்சைப் பிரிவில் சிகிச்சை அளிக்கப்பட்டபோதும், அவர் உயிரிழந்ததாக மருத்துவமனை அறிவித்தது.
