ஈப்போ:
கடந்த 2025-ஆம் ஆண்டு தேசிய தினக் கொண்டாட்டத்தின் போது, பேராக் சுல்தானை நோக்கி அத்துமீறிச் செல்ல முயன்றதாகக் குற்றம் சாட்டப்பட்ட 41 வயது பெண், தன் மீதான குற்றச்சாட்டை மீட்டுக் கொள்ளுமாறு அரசுத் தரப்பு வழக்கறிஞர் அலுவலகத்தில் (AGC) மனு தாக்கல் செய்துள்ளார்.
ஆகஸ்ட் 31, 2025 அன்று காலை 8:20 மணியளவில், ஈப்போ நகர மண்டபத்திற்கு முன்னால் உள்ள மேடையில் அமர்ந்திருந்த சுல்தான் நஸ்ரின் ஷாவை நோக்கி நூர்ஹஸ்வானி அஃப்னி முகமட் ஜோர்க்கி என்ற பெண் திடீரென ஓடிச் சென்றார். பாதுகாப்புப் படையினர் அவரைச் சுல்தானுக்கு அருகில் நெருங்க விடாமல் தடுத்து நிறுத்தினர்.
கடந்த அக்டோபர் 8-ஆம் தேதி, இப்பெண் குற்றத்தை ஒப்புக்கொண்ட போதிலும், நீதிமன்றம் அதை ஏற்கவில்லை. ஏனெனில், ‘தஞ்சோங் ரம்புத்தான் பஹாகியா’ (Hospital Bahagia Tanjung Rambutan) மருத்துவமனையின் அறிக்கைப்படி, அவர் ‘ஸ்கிசோஃப்ரினியா’ (Schizophrenia) எனும் மனநலப் பாதிப்பால் பாதிக்கப்பட்டிருப்பதும், சம்பவத்தின் போது அவர் சுயநினைவில் இல்லை என்பதும் தெரியவந்தது.
அவரது வழக்கறிஞர் சுல்ஸாரிஃப் சகுவான் கூறுகையில், பிப்ரவரி 6-ஆம் தேதி வழக்கைத் தள்ளுபடி செய்வதற்கான பிரதிநிதித்துவ மனுவைச் சமர்ப்பித்துள்ளதாகத் தெரிவித்தார்.
இந்த வழக்கு பொதுநலன் சார்ந்தது என்பதால், இதற்கான சிறந்த தீர்வைக் காணத் தற்காப்புத் தரப்பும் அரசுத் தரப்பும் ஆலோசித்து வருகின்றன.
மஜிஸ்திரேட் முகமட் ஹரித் முகமட் மஸ்லான் இந்த வழக்கின் அடுத்தகட்ட விசாரணையை ஏப்ரல் 1-ஆம் தேதிக்கு ஒத்திவைத்துள்ளார்.
நூர்ஹஸ்வானி மீது குற்றவியல் சட்டத்தின் பிரிவு 352-ன் கீழ் வழக்குப் பதிவு செய்யப்பட்டுள்ளது. இக்குற்றத்திற்கு அதிகபட்சமாக 3 மாதச் சிறைத்தண்டனை அல்லது RM1,000 அபராதம் அல்லது இரண்டுமே விதிக்கப்பட வாய்ப்புள்ளது.
உணவக ஊழியரான இவர், இந்தச் சம்பவத்திற்கு முன்னரே மனநலக் கண்காணிப்பில் இருந்து வந்தவர் என்பது குறிப்பிடத்தக்கது.
