ஜோகூர் பாரு:
வியட்நாம் நாட்டுப் பெண் பயணி ஒருவரிடம் தவறாக நடக்க முயன்றதாகக் கூறப்படும் இ-ஹெய்லிங் ஓட்டுநர் மீது நாளை (பிப்ரவரி 13) மஜிஸ்திரேட் நீதிமன்றத்தில் முறைப்படி குற்றஞ்சாட்டப்பட உள்ளது.
இந்த மாதத் தொடக்கத்தில் தனது ‘பெருடுவா பெஸா’ (Perodua Bezza) காரில் பயணித்த பெண்ணிடம் அந்த ஓட்டுநர் பாலியல் சீண்டல்களில் ஈடுபட்டதாகக் கூறப்படுகிறது. இது தொடர்பான வீடியோ சமூக வலைதளங்களில் வைரலானதைத் தொடர்ந்து, பிப்ரவரி 4-ஆம் தேதி அவர் கைது செய்யப்பட்டார்.
அதிர்ச்சியளிக்கும் விதமாக, கைதான நபர் ஒரு அரசு ஊழியர் என்பது விசாரணையில் தெரியவந்துள்ளது என்று, ஜோகூர் மாநில போலீஸ் தலைமைத் தளபதி டத்தோ அப் ரஹ்மான் அர்சாட் கூறினார்.
இந்த வழக்கு குறித்த விசாரணை கோப்புகள் மாநில அரசுத் தரப்பு வழக்கறிஞர் அலுவலகத்திற்கு அனுப்பப்பட்டன. அதனடிப்படையில், குற்றவியல் சட்டத்தின் பிரிவு 354-ன் கீழ் (பெண்ணின் கண்ணியத்திற்குப் பங்கம் விளைவிக்கும் நோக்கில் குற்றவியல் பலத்தைப் பயன்படுத்துதல்) அவர் மீது வழக்குப் பதிவு செய்ய உத்தரவிடப்பட்டுள்ளது.
இக்குற்றச்சாட்டு நிரூபிக்கப்பட்டால், அதிகபட்சமாக 10 ஆண்டுகள் சிறைத்தண்டனை, அபராதம், பிரம்படி அல்லது இவற்றில் ஏதேனும் இரண்டு தண்டனைகள் விதிக்கப்பட வாய்ப்புள்ளது.
பாதிக்கப்பட்ட வியட்நாம் நாட்டுப் பெண், காரினுள் நடந்த அந்த அநாகரிகச் செயலைத் தனது அலைபேசியில் பதிவு செய்துள்ளார். இந்த வீடியோவே தற்போது குற்றவாளியைத் தண்டிப்பதற்கான மிக முக்கிய ஆதாரமாகக் கருதப்படுகிறது.
