பெனாம்பாங், மார்ச் 4, 2026:
டொங்கோங்கானில் நேற்று (செவ்வாய்க்கிழமை) மேற்கொள்ளப்பட்ட ஒருங்கிணைந்த அதிரடி சோதனையில், 550 டன்னுக்கும் அதிகமான உறைந்த கோழி மற்றும் இறைச்சி தயாரிப்புகள் பறிமுதல் செய்யப்பட்டன.
சபா பிராந்திய 4 கடல்சார் காவல்துறை (PPM) மற்றும் பல்வேறு அமலாக்க முகமைகள் இணைந்து இந்தச் சோதனையை நடத்தின.
கம்போங் நம்பசானில் (Kampung Nambazan) உள்ள ஒரு சேமிப்புக் கிடங்கில் காலை 10 மணியளவில் இந்த நடவடிக்கை தொடங்கியது.
பறிமுதல் செய்யப்பட்ட இறைச்சி மற்றும் குளிரூட்டும் கிடங்கு வசதி ஆகியவற்றின் மொத்த மதிப்பு சுமார் RM14.56 மில்லியன் என மதிப்பிடப்பட்டுள்ளது என்று, சபா பிராந்திய 4 PPM தளபதி அசிஸ்டண்ட் கமிஷனர் அஹமட் அம்ரி அப்துல் ரஹ்மான் வெளியிட்ட ஓர் அறிக்கையில் தெரிவித்துள்ளார்.
பறிமுதல் செய்யப்பட்ட சில பொருட்கள் ஏற்கனவே காலாவதியாகிவிட்டதை சுகாதார அமைச்சகம் கண்டறிந்துள்ளது.
மேலும் சமர்ப்பிக்கப்பட்ட ஆவணங்களில் குளறுபடிகள் இருப்பதை கால்நடை சேவைகள் துறை உறுதிப்படுத்தியது. இவை உணவுப் பாதுகாப்பு மற்றும் கால்நடை விதிமுறைகளுக்கு முரணாக உள்ளன.
இந்தச் சம்பவம் தொடர்பாக விசாரணைக்கு உதவுவதற்காக உள்ளூர் நபர் ஒருவர் கைது செய்யப்பட்டுள்ளார். இச்சம்பவம் குறித்து 1983-ஆம் ஆண்டு உணவுச் சட்டத்தின் கீழ் விசாரணை மேற்கொள்ளப்பட்டு வருகிறது என்று அவர் கூறினார்.
