கோலாலம்பூர்:
சாலை வரி (Road Tax) புதுப்பிக்கத் தவறிய வாகன ஓட்டிகளுக்கு எதிராக நாடு தழுவிய அளவில் போக்குவரத்துத் துறை (RTD) நடத்திய அதிரடி சோதனையில், முன்னாள் தேசிய காற்பந்து வீரர் மற்றும் ஒரு பிரபல ஊக்கமளிக்கும் பேச்சாளர் (Motivational Speaker) ஆகியோரின் சொகுசு கார்கள் பறிமுதல் செய்யப்பட்டுள்ளன.
‘ஓப் லக்சரி’ (Op Luxury) என்ற இந்தச் சிறப்பு நடவடிக்கை மூலம் போர்ஷே (Porsche), லம்போகினி (Lamborghini) உள்ளிட்ட பல உயர்தர சொகுசு வாகனங்கள் பறிமுதல் செய்யப்பட்டுள்ளதாகப் போக்குவரத்துத் துறையின் துணை இயக்குநர் ஜெனரல் (திட்டமிடல் மற்றும் செயல்பாடுகள்) டத்தோ ஜாஸ்மானி ஷாபாவி தெரிவித்துள்ளார்.
நேற்று அதிகாலை புக்கிட் பிந்தாங் பகுதியில் இவரது ‘டொயோட்டா வெல்ஃபயர்’ (Toyota Vellfire) வாகனம் சோதனையிடப்பட்டது. அதில் செல்லுபடியாகும் காப்புறுதி (Insurance) இல்லாதது, காலாவதியான சாலை வரி மற்றும் காலாவதியான ஓட்டுநர் உரிமம் ஆகிய மூன்று குற்றச்சாட்டுகளின் கீழ் அந்த வாகனம் பறிமுதல் செய்யப்பட்டு கோலாலம்பூர் போக்குவரத்துத் துறை கிடங்கிற்கு அனுப்பப்பட்டது. முன்னாள் தேசிய காற்பந்து வீரரின் வாகன சாலை வரி கடந்த டிசம்பர் 2025-லேயே காலாவதியாகிவிட்டது குறிப்பிடத்தக்கது.
கிள்ளான் பள்ளத்தாக்கு பகுதியில் ஊக்கமளிக்கும் பேச்சாளரது ‘பிராபஸ் ஜி-வேகன்’ (Brabus G-Wagon) சொகுசு கார் பறிமுதல் செய்யப்பட்டது. இந்த வாகனத்திற்கும் சாலை வரி மற்றும் காப்புறுதி இல்லை. மேலும், எண் பலகை மாற்றும் செயல்முறை (Number plate interchange) முடிந்த பிறகும், இந்த வாகனம் பழைய பதிவு எண்ணையே பயன்படுத்தியதும் கண்டுபிடிக்கப்பட்டது. இந்த வாகனத்தின் மதிப்பு RM500,000-க்கும் அதிகம் என்றும், இதன் ஆண்டு சாலை வரி மட்டும் RM3,000-ஐத் தாண்டும் என்றும் கூறப்பட்டுள்ளது.
பொதுவாக இவ்வாறு பிடிபடுபவர்கள் சாலை வரியைப் புதுப்பிக்க “மறந்துவிட்டோம்” என்றே கூறுவதாக டத்தோ ஜாஸ்மானி தெரிவித்தார்.
“இனிமேலும் இத்தகைய சாக்குகளை ஏற்றுக்கொள்ள முடியாது. ஏனெனில் ‘MyJPJ’ செயலி (Application) சாலை வரி காலாவதியாவதற்கு முன்பே தானியங்கி நினைவூட்டல்களை (Automated reminders) அனுப்புகிறது. டிஜிட்டல் அறிவிப்புகள் மூலம் வாகன உரிமையாளர்கள் எச்சரிக்கப்படுவதால், புதுப்பிக்கத் தவறுவதற்கு எந்தக் காரணமும் இல்லை,” என்று அவர் குறிப்பிட்டார்.
இந்த ‘ஓப் லக்சரி’ திட்டத்தின் கீழ் இதுவரை மொத்தம் 1,814 சொகுசு வாகனங்கள் பறிமுதல் செய்யப்பட்டுள்ளன. (2025 ஆம் ஆண்டில் 899 வாகனங்களும், இந்த ஆண்டில் இதுவரை 915 வாகனங்களும் பறிமுதல் செய்யப்பட்டுள்ளன).
சாலை வரியைப் புதுப்பிக்கத் தவறுவது சாலைப் போக்குவரத்துச் சட்டத்தின் கீழ் கடுமையான குற்றமாகும்.
சரியான சாலை வரி இல்லாமல் பயன்படுத்தப்படும் வாகனங்கள் விபத்துக்குள்ளானால், அவற்றுக்குக் காப்புறுதி இழப்பீடு (Insurance cover) கிடைக்காது என்றும், இதில் எந்த சமரசமும் இன்றி வாகனங்கள் பறிமுதல் செய்யப்படும் என்றும் அவர் எச்சரித்துள்ளார்.
