கோலாலம்பூர்:
வரவிருக்கும் மாநிலத் தேர்தல்களில் PKR கட்சி ஜோகூரில் குறைந்தபட்சம் 20 தொகுதிகளிலும், நெகிரி செம்பிலானில் 16 தொகுதிகளிலும் போட்டியிடும் என்று அக்கட்சியின் பொதுச்செயலாளர் டத்தோ டாக்டர் புசியா சாலே தெரிவித்துள்ளார்.
பக்காத்தான் ஹரப்பான் (PH) கூட்டணிக் கட்சிகளுக்கு இடையேயான தொகுதிப் பங்கீட்டுப் பேச்சுவார்த்தைகள் அனைத்தும் சுமூகமான முறையில் இறுதி செய்யப்பட்டு நிறைவடைந்துள்ளதாக அவர் கூறினார்.
இன்று இங்குள்ள பண்டார் குவாந்தான் புத்ரியில் உள்ள முன்னணி சூப்பர் மார்க்கெட் கிளை ஒன்றை அதிகாரப்பூர்வமாகத் திறந்து வைத்த பின்னர் செய்தியாளர்களிடம் பேசிய அவர்,”நெகிரி செம்பிலானில் பிகேஆர் போட்டியிடும் தற்போதைய தொகுதிகளின் எண்ணிக்கை 16 என்றும், ஜோகூரில் குறைந்தபட்சம் 20 தொகுதிகள் என்றும் நான் அறிகிறேன்… அனைத்தும் சுமுகமாக முடிந்துவிட்டன,” என்று கூறினார்.
முன்னதாக, ஜோகூர் மாநிலத் தேர்தலின் அனைத்து 56 தொகுதிகளிலும், நெகிரி செம்பிலான் மாநிலத் தேர்தலின் அனைத்து 36 தொகுதிகளிலும் பக்காத்தான் ஹரப்பான் போட்டியிடும் என்று அறிவிக்கப்பட்டிருந்தது குறிப்பிடத்தக்கது.
இதற்கிடையில், நாடு கோவிட்-19 தொற்றால் பாதிக்கப்பட்டிருந்த காலத்தில் நடைபெற்ற கடந்த மாநிலத் தேர்தலுடன் ஒப்பிடுகையில், இம்முறை ஜோகூர் தேர்தலில் வாக்காளர்களின் வருகை அதிகரிக்கும் என்று எதிர்பார்ப்பதாக புசியா கூறினார். “சிங்கப்பூரில் பணிபுரியும் வாக்காளர்கள் கடந்த 2022-ஆம் ஆண்டு சுகாதாரக் கவலைகள் காரணமாக வாக்களிக்க வரவில்லை. இம்முறை அதிகப்படியான வாக்காளர்கள் வாக்களிக்க வருவார்கள் என்று நான் நம்புகிறேன், இது பக்காத்தான் ஹரப்பானுக்கு சாதகமாக அமையும்,” என்றார் அவர்.
‘பார்ட்டி பெர்சாமா மலேசியா’ (Parti Bersama Malaysia) மற்றும் ‘பார்ட்டி வாவாசான் நெகாரா’ (Parti Wawasan Negara) ஆகிய புதிய கட்சிகளின் அரசியல் வரவு குறித்துப் பேசிய புசியா, 2008 பொதுத் தேர்தலுக்குப் பிறகு மலேசியாவின் அரசியல் நிலப்பரப்பு மாறத் தொடங்கியதாகக் குறிப்பிட்டார்.”முதிர்ச்சியடைந்த பல ஜனநாயக நாடுகளில், பல கட்சி முறை என்பது இயல்பான ஒன்றாகும். மத்திய மற்றும் மாநில நிலைகளில் வெவ்வேறு கூட்டணிகள் ஆட்சி செய்வது பொதுவானது, இதனை மலேசியாவில் விசித்திரமாகப் பார்க்கக் கூடாது,” என்று அவர் கூறினார்.
அரசியல் போட்டிகள் ஆரோக்கியமான முறையில் நடத்தப்பட வேண்டும் என்றும், எதிர்த்தரப்பினரைத் தாக்குவதிலோ அல்லது குறைமதிப்பிற்கு உட்படுத்துவதிலோ கவனம் செலுத்தாமல், மக்களுக்குப் பயனளிக்கும் கருத்துக்கள் மற்றும் கொள்கைகளில் கட்சிகள் கவனம் செலுத்த வேண்டும் என்றும் புசியா வலியுறுத்தினார்.நேற்று, பெர்சத்து (Bersatu) கட்சியின் முன்னாள் துணைத் தலைவர் டத்தோஸ்ரீ ஹம்சா ஜைனுடின், ‘பார்ட்டி வாவாசான் நெகாரா’ என்ற புதிய கட்சியைத் தொடங்குவதாகவும், அது ஜோகூர் மற்றும் நெகிரி செம்பிலான் மாநிலத் தேர்தல்களில் போட்டியிடும் என்றும் அறிவித்திருந்தது குறிப்பிடத்தக்கது.
