கோலாலம்பூர்:
மலேசியா மற்றும் தாய்லாந்து நாடுகளுக்கு இடையே கடல் உணவுப் பொருட்கள் இறக்குமதி மற்றும் ஏற்றுமதி மீதான கட்டுப்பாடுகள் குறித்து இருதரப்பு பேச்சுவார்த்தைகள் தீவிரமாக நடைபெற்று வருகின்றன.
குறிப்பாக ‘சீகாப்’ (Siakap / Sea Bass) மீன் மற்றும் சில குறிப்பிட்ட இறால் வகைகளுக்கான வர்த்தகக் கட்டுப்பாடுகள் குறித்து, தாய்லாந்து அரசிடமிருந்து மலேசியாவிற்குப் பதிலளிப்பு கிடைத்துள்ளதாக விவசாயம் மற்றும் உணவுப் பாதுகாப்பு அமைச்சகத்தின் பொதுச்செயலாளர் டத்தோஸ்ரீ இஷாம் இஷாக் தெரிவித்துள்ளார்.
இன்று இங்கு நடைபெற்ற ‘2026 மலேசிய விவசாயம், தோட்டக்கலை மற்றும் விவசாயச் சுற்றுலா கண்காட்சி’ (MAHA 2026) மத்திய மண்டல நிகழ்ச்சியைத் தொடங்கி வைத்த பின் செய்தியாளர்களிடம் பேசிய அவர், “இந்த விவகாரம் தற்போது பேச்சுவார்த்தை கட்டத்தில் உள்ளது. இரு நாட்டுப் பிரதமர்களின் கவனத்திற்கு இது கொண்டு செல்லப்பட்டுள்ளதால், சிறந்ததொரு தீர்வை எட்ட தீவிர ஆலோசனைகள் நடந்து வருகின்றன. நமது நாட்டின் நலன்களைப் பாதுகாப்பதில் நாம் உறுதியாக இருக்கிறோம்; அதே வேளையில், மலேசியாவிற்கான தங்களின் மீன் மற்றும் இறால் ஏற்றுமதியில் தெளிவான சுமுகநிலையை ஏற்படுத்த தாய்லாந்தும் முயன்று வருகிறது,” என்று கூறினார்.
தாய்லாந்து தரப்பிலிருந்து பெறப்பட்ட தகவல்களை மலேசிய அரசு இன்னும் முழுமையாக ஆய்வு செய்து வருவதாகக் குறிப்பிட்ட அவர், “தகவல்கள் கிடைத்துள்ளன. இனி நாம் செய்ய வேண்டியது, அந்தத் தகவல்கள் நமது நாட்டின் உயிர் பாதுகாப்பு (Biosecurity) விதிகளுக்கு உட்பட்டு இருக்கின்றனவா என்பதை மதிப்பீடு செய்து, சரிபார்த்து, தணிக்கை செய்வதுதான்,” என்றார்.
கடந்த மாதம், மலேசியாவிலிருந்து இறக்குமதி செய்யப்பட்ட சீகாப் மீன்களில் ரசாயன எச்சங்கள் கண்டறியப்பட்டதாகக் கூறி தாய்லாந்து அதற்குத் தடை விதித்தது.
இதற்குப் பதிலடியாக மலேசியாவும் தாய்லாந்திலிருந்து வரும் கடல் உணவுகளுக்கான இறக்குமதி கட்டுப்பாடுகளைக் கடுமையாக்கியது. அதன்படி, சீகாப் மீன்களுக்கு ‘பகுப்பாய்வு சான்றிதழ்’ (Certificate of Analysis) கட்டாயமாக்கப்பட்டதுடன், ஜூன் 1 முதல் ஐந்து குறிப்பிட்ட இறால் வகைகளின் இறக்குமதிக்குத் தற்காலிகத் தடையும் விதிக்கப்பட்டது.
மலேசியாவின் இந்த அதிரடித் தடையைத் தொடர்ந்து, தாய்லாந்து பிரதமர் அனுதின் சார்ன்விராகுல் (Anutin Charnvirakul) கடந்த ஜூன் 2 அன்று மலேசியாவுடன் அவசரப் பேச்சுவார்த்தை நடத்த உத்தரவிட்டார். இந்தத் தடை நீடித்தால் தங்களது நாட்டு இறால் வளர்ப்பாளர்கள், ஏற்றுமதியாளர்கள் மற்றும் கடல் உணவு விநியோகச் சங்கிலி கடுமையாகப் பாதிக்கப்படும் என்று தாய்லாந்து கவலை தெரிவித்துள்ள நிலையில், இப்பேச்சுவார்த்தை முக்கியத்துவம் பெற்றுள்ளது.
