கோலாலம்பூர்:
வரவிருக்கும் நெகிரி செம்பிலான் மாநிலச் சட்டமன்றத் தேர்தலில், மூத்த தலைவர்களைத் தக்கவைத்துக்கொண்டு சில புதிய முகங்களை அறிமுகப்படுத்தியுள்ள தேசிய முன்னணியின் (BN) முடிவு, அனுபவத்தை முதலீடாகக் கொண்டு வெற்றியை இலக்காகக் கொண்ட ஒரு எச்சரிக்கையான உத்தி என அரசியல் ஆய்வாளர்கள் தெரிவித்துள்ளனர்.
மலாயா பல்கலைக்கழகத்தின் சமூக-அரசியல் ஆய்வாளர் பேராசிரியர் டத்தோ டாக்டர் அவாங் அஸ்மான் அவாங் பாவி மற்றும் பன்னாட்டு இஸ்லாமிய பல்கலைக்கழகத்தின் அரசமைப்பு நிபுணர் டத்தோ டாக்டர் வான் அகமது ஃபவ்சி வான் ஹுசேன் ஆகியோர் இந்த வேட்பாளர் பட்டியல் குறித்து வெளியிட்டுள்ள கருத்துக்களின் அடிப்படையில், தேசிய முன்னணி மொத்தமுள்ள 36 இடங்களில் 25 இடங்களுக்கு மட்டுமே வேட்பாளர்களை அறிவித்ததுதான் இந்தத் தேர்தலின் மிகப்பெரிய ஆச்சரியம் என்று ஆய்வாளர்கள் கூறுகின்றனர். இது, BN தனித்துப் போட்டியிடாமல் தனது ‘நம்பிக்கையான நண்பர்களுடன்’ ஒரு தந்திரோபாய தேர்தல் உடன்பாட்டை (Tactical Electoral Understanding) எட்ட முயல்வதையே காட்டுகிறது.
2004 முதல் ரந்தாவ் (Rantau) தொகுதி சட்டமன்ற உறுப்பினராகவும், முன்னாள் மந்திரி பெசாராகவும் இருந்த ‘டத்தோ ஸ்ரீ முகமட் ஹசான் (Tok Mat)’ தான் இந்தத் தேர்தலிலும் BN-இன் மிகப்பெரிய பலம் மற்றும் பிரசார முகமாக இருப்பார்.
டத்தோ ஸ்ரீ ஜலாலுடின் அலியாஸ், பெர்தாங் (Pertang) தொகுதியைத் தற்காக்கும் இவர், அம்னோவின் தற்போதைய மாநிலத் தலைமையின் எதிர்கால திசையைக் காட்டும் அடையாளமாகத் திகழ்கிறார்.
மேலும் தற்காலிக மந்திரி பெசாரான பக்காத்தான் ஹரப்பானின் அமினுடின் ஹருனை எதிர்த்து, லிங்கி தொகுதியில் தங்களின் அனுபவம் வாய்ந்த அடிமட்டத் தலைவர் டத்தோ முகமட் ஃபைசல் ரம்லியை BN மீண்டும் களமிறக்கியுள்ளது. இது இந்தத் தொகுதியை அவ்வளவு எளிதாக விட்டுக்கொடுக்க BN தயாராக இல்லை என்பதைக் காட்டுகிறது.
வேட்பாளர் பட்டியலில் முகமட் சுஃபியான் மராட்ஸி, முகமட் கையும் அப்துல் ஜலில், எஸ். லேசா முகமட் யாசின், சித்தி நூர்உமைரா ஹாசிம் மற்றும் சுஹைமிசான் பிசார் போன்ற புதிய முகங்கள் சேர்க்கப்பட்டுள்ளது ஓரளவுக்குப் புதுமையைத் தந்துள்ளது.
இருப்பினும், இது ஒரு உண்மையான புதிய தலைமுறையைக் காட்டும் அளவுக்குப் போதுமானதாக இல்லை என்று ஆய்வாளர் அவாங் அஸ்மான் குறிப்பிட்டுள்ளார். பிரச்சாரத்தை அதிர வைக்கக்கூடிய அளவுக்குப் புதிய இளைய தலைமுறை நட்சத்திரங்கள் யாரும் இதில் தனித்துத் தெரியவில்லை. எனவே, இந்த வேட்பாளர் பட்டியலின் முழு பலமும் ‘தோக் மாட்’-டின் நற்பெயர் மற்றும் BN-இன் அடிமட்ட தேர்தல் இயந்திரத்தின் (Grassroots Machinery) மீதே தங்கியுள்ளது.
தேசிய முன்னணியின் மூத்த வேட்பாளர்கள் தங்களின் பாரம்பரியக் கோட்டைகளைத் தக்கவைத்துக் கொள்ளும் அதே வேளையில், இந்த புதிய முகங்கள் கலப்புத் தொகுதிகளில் இருக்கும் இளம் வாக்காளர்களை எந்த அளவுக்குக் கவருவார்கள் என்பதைப் பொறுத்தே BN-இன் வெற்றி அமையும் என்று அரசியல் ஆய்வாளர்கள் கணித்துள்ளனர்.
