நஜிப் ரசாக்கின் சிறைத்தண்டனையை குறைக்கும் கூட்டரசு பிரதேச மன்னிப்பு வாரியத்தின் முடிவை ஏற்று கொண்டு அடுத்த கட்ட நகர்வினை “தொடர” கட்சி உறுப்பினர்களை அம்னோ துணைத் தலைவர் ஜோஹாரி கனி வலியுறுத்தியுள்ளார்.
அம்னோ தலைவர்கள் மற்றும் உறுப்பினர்களின் கவனம் இப்போது கட்சியை வலுப்படுத்தவும் புத்துயிர் பெறவும் வேலை செய்வதில் இருக்க வேண்டும் என்று ஜோஹாரி கூறியதாக என்எஸ்டி ஆன்லைன் செய்தி வெளியிட்டுள்ளது.
அம்னோ தலைவர் அகமட் ஜாஹிட் ஹமிடி மற்றும் கட்சியின் 191 பிரிவு தலைவர்களுக்கு இடையே இன்று இரண்டு மணி நேர மூடிய அறை சந்திப்பிற்குப் பிறகு அவர் செய்தியாளர்களிடம் பேசினார்.
தித்திவாங்சா நாடாளுமன்ற உறுப்பினரான ஜோஹாரி, அம்னோ தலைவர்களும் உறுப்பினர்களும் ஒரு காலத்தில் மேலாதிக்கம் செலுத்திய பாரிசான் நேஷனல் மீண்டும் எழுச்சி பெற்று மலேசியர்களுக்காகப் போராடுவதில் வலுவடையும் என்பதை தங்கள் எதிர்ப்பாளர்களுக்கு நிரூபிக்க வேண்டிய நேரம் இது என்றார்.
மன்னிப்பு வாரியம் எடுத்த முடிவை நாம் ஏற்க வேண்டும். கட்சியை வலுப்படுத்தும் நோக்கில் முன்னேறிச் செல்வோம். 2027ஆம் ஆண்டுக்குள் கட்சி வலுப்பெறுவதை உறுதிசெய்ய அம்னோவால் முன்னேற முடியும் என்பதை மக்களுக்குக் காட்டுவோம் என்று அவர் கூறினார், அடுத்த பொதுத் தேர்தலை பிப்ரவரி 2027க்குள் நடத்த வேண்டும்.
நஜிப்பின் சிறைத்தண்டனை 12 ஆண்டுகளில் இருந்து 6ஆக பாதியாக குறைக்கப்பட்டு, அவரது அபராதம் RM210 மில்லியனில் இருந்து RM50 மில்லியனாக குறைக்கப்பட்டதாக அறிவிக்கப்பட்டதை தொடர்ந்து கட்சியின் பிரிவு தலைவர்களுடனான இன்றைய மூடிய கதவு சந்திப்புக்கு அழைப்பு விடுக்கப்பட்டது. நஜிப் ஆகஸ்ட் 23, 2028 அன்று விடுவிக்கப்படுவார் என்று மன்னிப்பு வாரியம் கூறியது.
நேற்று, அம்னோ உச்ச கவுன்சில், நஜிப்பிற்கு நீதியைக் கோருவதற்கான முயற்சிகளைத் தொடரும் என்றாலும், வாரியத்தின் முடிவை மிகவும் வருந்துவதாகக் கூறியது. எஸ்ஆர்சி இன்டர்நேஷனல் வழக்கில் நஜிப்புக்கு நியாயமான விசாரணை கிடைக்கவில்லை என்றும் அவருக்கு நீதி கிடைக்க வேண்டும் என்று அம்னோ மீண்டும் வலியுறுத்தியது.
