கைபர் பக்துன்குவா,பாகிஸ்தானில் கைபர் பக்துன்குவா மாகாணத்தில் கடந்த வெள்ளி கிழமை காலையில் கனமழை பெய்ய தொடங்கியது. தொடர்ந்து நேற்றும் கனமழை பெய்தது. இதில், சர்சடா மாவட்டத்தில் உள்ள வீடு ஒன்று இடிந்து விழுந்தது. இந்த சம்பவத்தில் சிக்கி ஒரே குடும்பத்தின் 5 பேர் உயிரிழந்தனர்.
அவர்களில் 3 பேர் குழந்தைகள் ஆவர். இதுதவிர, அப்பர் தீர் பகுதியில் இடி, மின்னல் தாக்கியதில் நபர் ஒருவர் பலியானார். இதனால், 2 நாட்களில் கனமழைக்கு பலியானோர் எண்ணிக்கை 6 ஆக உள்ளது.
அடுத்தடுத்த நாட்களிலும் கனமழை தொடர கூடும் என எதிர்பார்க்கப்படுகிறது. இதனால், கண்காணிப்புடன் இருக்கும்படி மாவட்ட நிர்வாகத்திடம் கேட்டு கொள்ளப்பட்டு உள்ளது.
இந்த மாகாணத்தில் கடந்த ஜூலை 1 முதல் செப்டம்பர் 14 வரையில் கனமழை, நிலச்சரிவுகள் மற்றும் வெள்ளம் ஆகியவற்றில் சிக்கி 107 பேர் பலியாகி உள்ளனர். 146 பேர் காயமடைந்தனர். 977 வீடுகள் சேதமடைந்து உள்ளன என அந்நாட்டின் ஊடகம் டான் வெளியிட்ட செய்தி தெரிவிக்கின்றது.
