கோலாலம்பூர்,
2018-ம் ஆண்டு தொடங்கப்பட்ட 1எம்டிபி சொத்துக்கள் மீட்பு அறக்கட்டளை கணக்கின் மூலம், 1எம்டிபி மற்றும் எஸ்ஆர்சி இன்டர்நேஷனலுடன் தொடர்புடைய RM 2,970 கோடி அரசாங்கத்தால் இதுவரை மீட்கப்பட்டுள்ளதாக நிதி அமைச்சகம் தெரிவித்துள்ளது.
பண்டார் துன் ரசாக் நாடாளுமன்ற உறுப்பினர் டத்தோ’ ஸ்ரீ டாக்டர் வான் அஜீசா வான் இஸ்மாயிலுக்கு எழுத்துப்பூர்வமாக அளித்த பதிலில், 2022 முதல் 2025 ஜூன் 30 வரை RM 1,090 கோடி திரட்டப்பட்டதாகவும், ஜூலை 31 நிலவரப்படி RM 4,217 கோடி 1எம்டிபி கடன் கொடுப்பனவுகள் மற்றும் பிற நிறுவனக் கடமைகளுக்காக செலுத்தப்பட்டதாகவும் கூறியுள்ளது.
இதில், நிதி அமைச்சகத்திலிருந்து RM 1,544 கோடி பங்கு நிறுவன முன்பணங்கள் அல்லது கடன்களில் இருந்து வந்ததாகவும், RM 2,673 கோடி மீட்கப்பட்ட 1எம்டிபி சொத்துகளிலிருந்து வந்ததாகவும் தெரிவிக்கப்பட்டுள்ளது. மொத்தமாக RM 2,893 கோடி 1எம்டிபியின் அசல் கடனைத் திருப்பிச் செலுத்த பயன்படுத்தப்பட்டு, RM 1,324 கோடி வட்டி மற்றும் பிற கடமைகளுக்காக செலுத்தப்பட்டுள்ளது.
“தற்போது, 2039 வரை சுகுக் IMTN-க்கு அசல் மற்றும் வட்டி கொடுப்பனவுகளை உள்ளடக்கிய மீதமுள்ள 1எம்டிபி கடன் RM 902 கோடியாக உள்ளது, இதில் RM 500 கோடி அசல் தொகையும் RM 402 கோடி வட்டியும் அடங்கும்,” என்று அமைச்சகம் தெரிவித்துள்ளது.
தவறாகப் பயன்படுத்தப்பட்ட 1எம்டிபி மற்றும் எஸ்ஆர்சி நிதிகளை மீட்டெடுப்பது சர்வதேச ஒத்துழைப்பு மற்றும் சட்ட நடவடிக்கைகளை உள்ளடக்கிய சிக்கலான, நீண்டகால செயல்முறையாகும் என்று அது குறிப்பிட்டுள்ளது.
அனைத்து நிலுவை கடன்களும் குறிப்பிட்ட காலக்கெடுவிற்குள் தீர்க்கப்படும் வகையில் வருமானத்தை அதிகரிக்க அரசாங்கம் உறுதியாக செயல்பட்டு வருவதாக அமைச்சகம் வலியுறுத்தியுள்ளது.
