சிரம்பான்:
கடந்த செப்டம்பர் 17 அன்று எடுக்கப்பட்ட கெராங் எனப்படும் மட்டி மாதிரிகளில் பயோடாக்சின் அளவு பில்லியனுக்கு 800 பாகங்களுக்குக் (ppb) குறைவாக இருப்பது உறுதிப்படுத்தப்பட்டதால், போர்ட்டிக்சன் கடல், கடற்கரையில் பிடிக்கப்படும் கெராங் மற்றும் பிற மட்டி மீன்கள் இப்போது நுகர்வுக்கு பாதுகாப்பானவை என நெகிரி செம்பிலான் மீன்வளத் துறை (JPNS) அறிவித்துள்ளது.
“சுங்கை செகாவாங்கிலிருந்து கம்போங் டெலோக், பாசிர் பஞ்சாங் வரையிலான நீரில் பைலிங் மற்றும் ராஃப்ட் முறையில் கெராங் வளர்ப்பு செய்பவர்கள் உடனடியாக சேகரிப்பு மற்றும் அறுவடை நடவடிக்கைகளைத் தொடங்கலாம். கடந்த நான்கு வாரங்களாக தொடர்ந்து எடுக்கப்பட்ட மாதிரிகளில் PSP அளவு 800 ppb-க்கும் குறைவாக இருந்ததால், அவை நுகர்வுக்கு பாதுகாப்பானவை என்பதை உறுதி செய்துள்ளோம்” என்று, JPNS இயக்குநர் காசிம் தாவே கூறினார்.
முன்னதாக ஆகஸ்ட் 15 அன்று எடுக்கப்பட்ட மாதிரிகளில் PSP அளவு 800 ppb-ஐ மீறியதால், போர்ட்டிக்சன் கடற்கரையில் கெராங் சேகரிப்பு மற்றும் விற்பனைக்கு JPNS தற்காலிகத் தடையை விதித்திருந்தது. அப்போது, உணவு விஷம் அபாயத்தைத் தவிர்க்க பொதுமக்கள் அந்தப் பகுதிகளில் இருந்து கிடைத்த கெராங் அல்லது மட்டி மீன்களை உட்கொள்ள வேண்டாம் என்றும் அறிவுறுத்தப்பட்டது.
மேலும் தடை காலத்தில் சேகரிக்கப்பட்ட மஸ்ஸல்கள் இருந்தால், அவற்றை அப்புறப்படுத்தி உட்கொள்ள வேண்டாம் என JPNS மீண்டும் எச்சரித்துள்ளது.
