கோலாலம்பூர்:
ஜார்ஜ் டவுன் பகுதியில் கடந்த ஞாயிற்றுக்கிழமை அதிகாலை நிகழ்ந்த கோஷ்டி மோதல் தொடர்பாக 23 முதல் 52 வயதுக்குட்பட்ட ஆறு நபர்களைப் போலீசார் கைது செய்துள்ளனர்.
கடந்த ஞாயிற்றுக்கிழமை (ஜனவரி 11, 2026) அதிகாலை 3.08 மணியளவில் சாலையோரம் ஒரு கும்பல் சண்டையிட்டுக் கொள்வதாகப் போலீசாருக்குப் பொதுமக்களிடமிருந்து புகார் கிடைத்தது.
புகாரைப் பெற்ற 20 நிமிடங்களிலேயே, அதாவது அதிகாலை 3.30 மணியளவில் ஜாலான் மெட்ராஸ் (Jalan Madras) பகுதியில் வைத்து ஆறு பேரையும் போலீசார் அதிரடியாகக் கைது செய்தனர்.
முதற்கட்ட விசாரணையில், சம்பந்தப்பட்ட நபர்களுக்கு இடையே ஏற்பட்ட ஒரு ‘கருத்து முரண்பாடே’ (Misunderstanding) இந்த மோதலுக்குக் காரணம் எனத் தெரியவந்தது என, வடகிழக்கு மாவட்டப் போலீஸ் தலைவர் அசிஸ்டண்ட் கமிஷனர் அப்துல் ரோசாக் முகமட் கூறினார்.
தொடக்கத்தில் இந்தக் கும்பல் கலகத்தில் (Rioting) ஈடுபட்டதாகக் குற்றவியல் சட்டத்தின் பிரிவு 147-இன் கீழ் விசாரணை நடத்தப்பட்டது. அவர்கள் அனைவரும் மூன்று நாட்கள் போலீஸ் காவலில் வைக்கப்பட்டனர்.
விசாரணையின் முடிவில், நான்கு பேர் மீது பொது இடத்தில் சண்டையிட்டுக் கொண்டதற்காக (Affray) பிரிவு 160-இன் கீழ் நீதிமன்றத்தில் குற்றம் சாட்டப்பட்டது. மற்ற இருவர் அரசுத் தரப்பு சாட்சிகளாக மாற்றப்பட்டனர்.
குற்றம் சாட்டப்பட்ட நான்கு பேரும் தங்கள் தவறை ஒப்புக்கொண்டதைத் தொடர்ந்து, அவர்களுக்குத் தலா 1,000 ரிங்கிட் அபராதம் விதிக்கப்பட்டது.
இந்த மோதல் தொடர்பான பல வீடியோக்கள் சமூக வலைதளங்களில் வைரலாகி வருகின்றன. பொது அமைதிக்குக் குந்தகம் விளைவிக்கும் செயல்களில் ஈடுபடுவோர் மீது கடும் நடவடிக்கை எடுக்கப்படும் எனப் போலீசார் எச்சரித்துள்ளனர்.
