கூலாய், பிப்ரவரி 7:
மலேசியாவில் இணைய வழி சூதாட்டம் மற்றும் ஆன்லைன் மோசடிகளைக் கட்டுப்படுத்தும் நோக்கில், கடந்த ஜனவரி மாதத்தின் முதல் இரு வாரங்களில் மட்டும் 20,000-க்கும் மேற்பட்ட பதிவுகளை மலேசியத் தகவல் தொடர்பு மற்றும் பல்லூடக ஆணையம் (MCMC) நீக்கியுள்ளது.
மலேசியத் தகவல் தொடர்புத் துறை துணை அமைச்சர் தியோ நீ சிங் இன்று செய்தியாளர்களிடம் பேசியபோது, இந்தப் புள்ளிவிவரங்களைப் பகிர்ந்து கொண்டார்.
ஜனவரி 1 முதல் 15 வரையிலான காலத்தில்: ஆன்லைன் சூதாட்டம் தொடர்பான 15,519 பதிவுகள், இணைய மோசடிகள் (Scams) தொடர்பான 5,421 பதிவுகள் என
மொத்தம் 20,940 பதிவுகள் சமூக ஊடகத் தளங்களிலிருந்து அகற்றப்பட்டுள்ளன என்று சொன்னார்.
MCMC-இன் செயல்முறை
“உள்ளடக்கக் கட்டுப்பாடுகள் அல்லது பதிவுகளை நீக்கும் பணிகளை அந்தந்த சமூக ஊடகத் தளங்களே (Platform providers) மேற்கொள்கின்றன.
பொதுமக்கள் அளிக்கும் புகார்களைச் சேகரித்து, அத்தளங்களுடன் இணைந்து செயல்படும் ஒரு பாலமாகவே MCMC இயங்குகிறது,” என்று அமைச்சர் விளக்கமளித்தார்.
குறிப்பாக, பொறுப்பற்ற நபர்கள் பணம் செலுத்தும் விளம்பரங்கள் (Paid Advertisements) மூலம் இத்தகைய மோசடி மற்றும் சூதாட்டப் பதிவுகளை அதிக மக்களிடம் கொண்டு சேர்ப்பது குறித்து அமைச்சர் தனது கவலையைத் தெரிவித்தார்.
புகார்கள் வந்த பிறகு நடவடிக்கை எடுப்பதை விட, தொடக்க நிலையிலேயே இத்தகைய பதிவுகளைக் கண்டறியும் வகையில் தங்களின் திரையிடல் (Screening) முறையை வலுப்படுத்துமாறு சமூக ஊடக நிறுவனங்களை MCMC கேட்டுக்கொண்டுள்ளது.
பொதுமக்களுக்கு அழைப்பு
இணையப் பாதுகாப்பை உறுதி செய்ய, பொதுமக்கள் இத்தகைய தீங்கு விளைவிக்கும் பதிவுகள் குறித்துத் தொடர்ந்து போலீசாருக்கும் MCMC-க்கும் புகார்களைத் தெரிவிக்குமாறு அமைச்சர் தியோ நீ சிங் வலியுறுத்தினார்
