கூலிம் | மார்ச் 08, 2026 :
பிரதமர் டத்தோஸ்ரீ அன்வார் இப்ராஹிம் நேற்று மாலை கெடா, கூலிம் பகுதியில் உள்ள தாமான் செலாசி (Taman Selasih) ரமலான் சந்தைக்குச் சென்று பொதுமக்களையும் வியாபாரிகளையும் நேரில் சந்தித்தார்.
மாலை 5:45 மணியளவில் சந்தைக்கு வருகை தந்த பிரதமர், சுமார் 30 நிமிடங்கள் அங்கு செலவிட்டார்.
உள்துறை அமைச்சர் டத்தோஸ்ரீ சைஃபுதீன் நசுத்தியான் இஸ்மாயில், இளைஞர் மற்றும் விளையாட்டுத் துறை அமைச்சர் டாக்டர் முகமட் தவ்பிக் ஜொஹாரி மற்றும் கெடா மாநில முதல்வர் டத்தோஸ்ரீ முகமட் சனுசி முகமட் நோர் ஆகியோர் பிரதமருடன் இருந்தனர்.
இந்தச் சந்தையில் உள்ள சுமார் 142 வியாபாரிகளில் பலரைச் சந்தித்த பிரதமர், உணவுப் பொருட்களின் தரம் மற்றும் விற்பனை குறித்துக் கேட்டறிந்தார்.
இளநீர் வியாபாரம் செய்யும் 19 வயது இளைஞர் முகமட் அஃபிக் இக்வான் ரோஸ்லி, பிரதமர் தனது கடைக்கு நேரில் வந்ததை எண்ணிப் பெருமிதம் அடைவதாகத் தெரிவித்தார்.
பிரதமரின் வருகையையொட்டி மாலை 5 மணி முதலே பொதுமக்கள் அந்தச் சந்தையில் பெருமளவில் திரண்டிருந்தனர்.
அரசியல் வேறுபாடுகளுக்கு அப்பாற்பட்டு, கெடா மாநில முதல்வருடன் இணைந்து பிரதமர் இந்தச் சந்தைக்கு வருகை தந்தது, ரமலான் மாதத்தில் நிலவும் நல்லிணக்கத்தை வெளிப்படுத்தும் விதமாக அமைந்தது.
