கோலாலம்பூர்:
மியன்மாரில் நிலவும் அரசியல் சூழல் மற்றும் மனித உரிமை மீறல்கள் காரணமாக, ஆசியான் உச்சிமாநாடுகள் மற்றும் அதிகாரப்பூர்வ கூட்டங்களில் அந்நாட்டின் அரசியல் தலைவர்கள் பங்கேற்பதை ஆசியான் நாடுகள் இன்னும் ஏற்கத் தயாராக இல்லை என்று மலேசிய வெளியுறவு அமைச்சர் டத்தோஸ்ரீ முகமட் ஹசான் தெரிவித்தார்.
இன்று பிலிப்பைன்ஸில் நடைபெற்ற ஆசியான் வெளியுறவு அமைச்சர்கள் கூட்டத்தில் (AMM) மியன்மார் விடுத்த கோரிக்கை குறித்து விவாதிக்கப்பட்டது.
“தங்கள் நாட்டு அரசியல் தலைவர்களை ஆசியான் கூட்டங்களில் அனுமதிக்க வேண்டும் என மியன்மார் கோரிக்கை விடுத்துள்ளது. ஆனால், வெளியுறவு அமைச்சர்கள் மட்டத்தில் அந்தக் கோரிக்கையை ஏற்க நாங்கள் இன்னும் தயாராக இல்லை” என்று, டத்தோஸ்ரீ முகமட் ஹசான் செய்தியாளர்களிடம் கூறினார்.
மியன்மாரில் அந்நாட்டு மக்கள் மீதான அடக்குமுறைகள் மற்றும் வன்முறைகள் தொடர்வது குறித்து ஆசியான் நாடுகள் மிகுந்த கவலை கொண்டுள்ளன. குறிப்பாக:பாதிக்கப்பட்ட பகுதிகளுக்கு மனிதாபிமான உதவிகளைக் கொண்டு சேர்ப்பதில் உள்ள சிக்கல்கள் குறித்து விரிவாக விவாதிக்கப்பட்டது.
தனது சொந்த மக்களுக்கு எதிராக ராணுவ அரசு மேற்கொண்டு வரும் நடவடிக்கைகள் ஆசியான் நாடுகளிடையே அதிருப்தியை ஏற்படுத்தியுள்ளது.
மியான்மாரில் அண்மையில் நடைபெற்ற தேர்தல்கள் அனைவரையும் உள்ளடக்கியதாக (Inclusive) இல்லை என்று ஆசியான் கருதுகிறது.
மியன்மாருடன் அதிகாரப்பூர்வமற்ற முறையில் (Informal basis) தொடர்புகளைத் தொடர ஆசியான் முடிவு செய்துள்ளது. இருப்பினும், மியன்மார் அரசு ஆசியானின் ‘ஐந்து அம்ச ஏகோபித்த முடிவுகளை’ (5-Point Consensus) முழுமையாகப் பின்பற்றினால் மட்டுமே, எதிர்காலக் கூட்டங்களில் அவர்களின் பங்கேற்பு குறித்து பரிசீலிக்கப்படும் என்று அமைச்சர் உறுதியாகத் தெரிவித்தார்.
இந்த விவகாரம் விரைவில் நடைபெறவுள்ள ஆசியான் தலைவர்களின் உச்சிமாநாட்டிலும் கொண்டு செல்லப்படும் என்று எதிர்பார்க்கப்படுகிறது.
