கோலாலம்பூர்:
ரஃபிஸி ரம்லி (Rafizi Ramli) மற்றும் நிக் நஸ்மி நிக் அமாட் (Nik Nazmi Nik Ahmad) ஆகியோர் முறையே தங்களது பாண்டான் மற்றும் செத்தியாவங்சா நாடாளுமன்ற உறுப்பினர் பதவிகளை இன்று (மே 18, 2026) முதல் ராஜினாமா செய்துள்ளனர்.
இன்று அவர்கள் வெளியிட்ட கூட்டு அறிக்கையில், தங்களது ராஜினாமா கடிதங்களை நாடாளுமன்ற சபாநாயகர் (Dewan Rakyat Speaker) டான்ஸ்ரீ ஜொஹாரி அப்துல்லிடம் சமர்ப்பித்துள்ளதாகத் தெரிவித்துள்ளனர்.
ஒரு புதிய அரசியல் செயற்பாட்டிற்காக எங்களின் நோக்கத்தைத் தொடர்ந்து, பாண்டான் மற்றும் செத்தியாவங்சா நாடாளுமன்ற இடங்களை நாங்கள் காலி செய்கிறோம்,” என்று அந்த அறிக்கையில் கூறப்பட்டுள்ளது.
கடந்த பொதுத்தேர்தலில் பக்காத்தான் ஹரப்பான் (Pakatan Harapan) கூட்டணியின் கீழ் தாங்கள் தேர்ந்தெடுக்கப்பட்டதால், பாண்டான் மற்றும் செத்தியாவங்சா வாக்காளர்களிடமே மீண்டும் அந்த அதிகாரத்தை ஒப்படைப்பதுதான் “சரியான மற்றும் மரியாதைக்குரிய நடவடிக்கை” என்று அவர்கள் குறிப்பிட்டுள்ளனர்.
கடந்த இரண்டு தவணைகளாக தங்களைத் தேர்ந்தெடுத்து, தங்களை பிரதிநிதிக்க வாய்ப்பளித்த தங்களது தொகுதி மக்களுக்கு இரு தலைவர்களும் நன்றியைத் தெரிவித்துக் கொண்டனர்.
தங்களது தொகுதி சேவை மையங்கள் வழக்கம் போல் தொடர்ந்து இயங்கும் என்றும், வாக்காளர்களுக்கான உதவிகளும் சேவைகளும் தங்கு தடையின்றி வழங்கப்படும் என்றும் அவர்கள் கூறியுள்ளனர்.
வரவிருக்கும் தேர்தலில், ‘பெர்சாமா’ (Bersama) என்ற புதிய கட்சியின் கீழ் பாண்டான் மற்றும் செத்தியாவங்சா நாடாளுமன்றத் தொகுதிகளில் தாங்கள் மீண்டும் போட்டியிடப் போவதையும் ரஃபிஸி மற்றும் நிக் நஸ்மி உறுதிப்படுத்தியுள்ளனர்.
இந்த ‘பெர்சாமா’ கட்சி குறித்தோ அல்லது அடுத்த தேர்தல் எப்போது நடக்கும் என்பது குறித்தோ அந்த அறிக்கையில் கூடுதல் விவரங்கள் எதுவும் தெரிவிக்கப்படவில்லை.
