கோலாலம்பூர்:
கோலாலம்பூர் சாலைகளில் மோட்டார் சைக்கிளின் முன் சக்கரத்தைத் தூக்கி (Wheelie) ஆபத்தான முறையில் சாகசம் புரிந்து, அதனை டிக் டாக் (TikTok) செயலியில் பரப்பிய இருவர் மீது நாளை கோலாலம்பூர் போக்குவரத்து நீதிமன்றத்தில் முறைப்படி குற்றச்சாட்டு பதிவு செய்யப்படவுள்ளது.
டிக் டாக் தளத்தில் வைரலான வீடியோக்களின் அடிப்படையில், 19 மற்றும் 31 வயதுடைய இரு சந்தேக நபர்களைக் கோலாலம்பூர் போக்குவரத்துப் புலனாய்வு மற்றும் அமலாக்கத்துறை (JSPT) போலீசார் கைது செய்துள்ளனர்.
கடந்த ஏப்ரல் 24-ஆம் தேதி ஜாலான் ராஜா லாட் (Jalan Raja Laut) பகுதியில், போக்குவரத்துச் சிக்னலின் சிவப்பு விளக்கை மீறி (Running Red Light), 155cc திறன் கொண்ட கருப்பு நிற ‘யமஹா Y15ZR’ ரக மோட்டார் சைக்கிளில் இவன் ஆபத்தான முறையில் சாகசம் செய்துள்ளான். இந்த வீடியோ மாவட்ட போக்குவரத்துப் பிரிவு போலீஸ் தலைவர் உதவி ஆணையர் (ACP) முகமட் ஜம்ஜுரி முகமட் இசாவிடம் சிக்கியதை அடுத்து, கடந்த மே 4-ஆம் தேதி அந்த இளைஞன் அதிரடியாகக் கைது செய்யப்பட்டு ஒரு நாள் போலீஸ் காவலில் வைக்கப்பட்டான்.
31 வயது நபர்: இதேபோல், கடந்த மே 9-ஆம் தேதி ‘செத்தியாவங்சா – பந்தாய் விரைவுச்சாலையில்’ (SPE Highway) மிக ஆபத்தான முறையில் மோட்டார் சைக்கிளை ஓட்டி, அதனை வீடியோவாகப் பரப்பிய மற்றொரு 31 வயது நபரும் போலீசாரால் அடையாளம் காணப்பட்டுக் கைது செய்யப்பட்டுள்ளார்.
கைது செய்யப்பட்டுள்ள இந்த இருவர் மீதும் 1987 சாலைப் போக்குவரத்துச் சட்டம் பிரிவு 42(1)-இன் கீழ் (ஆபத்தான மற்றும் அலட்சியமாக வாகனம் ஓட்டுதல்) நாளை குற்றச்சாட்டு சுமத்தப்படவுள்ளது.
இச்சட்டப்பிரிவின் கீழ் குற்றம் நிரூபிக்கப்பட்டால்:அதிகபட்சமாக 5 ஆண்டுகள் வரை சிறைத்தண்டனை விதிக்கப்படலாம், அல்லது 5,000 ரிங்கிட் முதல் 15,000 ரிங்கிட் வரை கடுமையான அபராதம் விதிக்கப்படலாம்.
சமூக ஊடகங்களில் பிரபலமாவதற்காகவும், ‘லைக்ஸ்’ (Likes) வாங்குவதற்காகவும் பொதுமக்களின் உயிருக்கு அச்சுறுத்தல் ஏற்படுத்தும் வகையில் பொதுச் சாலைகளில் பைக் சாகசங்களில் ஈடுபடுபவர்களுக்கு இக்கைது நடவடிக்கை ஒரு கடுமையான எச்சரிக்கையாக அமைந்துள்ளது.
