கோலாலம்பூர்:
கடந்த அக்டோபர் 7ஆம் தேதி கோலா சிலாங்கூரில் நடந்த துப்பாக்கிச் சூட்டில் ஒருவர் காயமடைந்த சம்பவம் தொடர்பாக, போலீசார் பத்து பேரை கைது செய்துள்ளதுடன், மேலும் இருவரை தேடி வருகின்றனர்.
29 வயது லாரி ஓட்டுநர் ஒருவர் வயிற்றில் சுடப்பட்ட சம்பவம் குறித்து, காவல்துறைக்கு அக்டோபர் 7 அன்று புகார் கிடைத்தது என்று, புக்கிட் அமான் குற்றப் புலனாய்வு துறை இயக்குநர் டத்தோ எம். குமார் தெரிவித்தார்.
சிலாங்கூர் மாநில காவல்துறையுடன் இணைந்து மேற்கொண்ட நடவடிக்கையில், 21 முதல் 40 வயதுக்குட்பட்ட பத்து உள்ளூர் ஆண்கள் கைது செய்யப்பட்டனர். கைது செய்யப்பட்டவர்கள் ஒழுங்கமைக்கப்பட்ட குற்றக் குழுவைச் சேர்ந்தவர்கள் என நம்பப்படுகிறது என்று அவர் கூறினார்.
கைது செய்யப்பட்டவர்களிடமிருந்து பெறப்பட்ட தகவலின் அடிப்படையில், போலீசார் அக்டோபர் 10 அன்று கோலா சிலாங்கூரில் உள்ள ஒரு வீட்டில் சோதனை நடத்தி, துப்பாக்கிச் சூட்டில் பயன்படுத்தப்பட்டதாக நம்பப்படும் பெரெட்டா தானியங்கி துப்பாக்கியை மீட்டனர்.
ஆரம்ப விசாரணையில், இந்தத் தாக்குதல் போதைப்பொருள் கடத்தல் நடவடிக்கைகள் தொடர்பான பிராந்திய தகராறிலிருந்து இந்த கருத்துவேறுபாடு ஏற்பட்டது என தெரியவந்தது.
கைது செய்யப்பட்டவர்கள் பலர் வன்முறை மற்றும் போதைப்பொருள் குற்றங்கள் தொடர்பான முந்தைய குற்றப் பதிவுகளைக் கொண்டவர்கள் என்று அவர் தெரிவித்தார்.
போலீசார் தற்போது மேலும் இரு சந்தேக நபர்களை கண்காணித்து வருகின்றனர், அதில் ஒருவர் ஒழுங்கமைக்கப்பட்ட குற்றச் செயல்களில் ஈடுபட்டதற்காக தேடப்பட்ட பட்டியலில் உள்ளவர் என கூறப்பட்டுள்ளது.
கைது செய்யப்பட்ட அனைவரும் அக்டோபர் 20 வரை விளக்கமறியலில் வைக்கப்பட்டுள்ளனர்.
இந்த வழக்கு தண்டனைச் சட்டம் பிரிவு 307 (கொலை முயற்சி) மற்றும் துப்பாக்கிச் சட்டம் (அதிகரிக்கப்பட்ட அபராதங்கள்) 1971 பிரிவு 3ன் கீழ் விசாரிக்கப்படுகிறது.
“ஒழுங்கமைக்கப்பட்ட குற்றச் செயல்களை ஒடுக்க போலீசார் தொடர்ந்தும் கடுமையான நடவடிக்கைகளை மேற்கொள்வார்கள்,” என்று டத்தோ எம். குமார் எச்சரித்தார்.
