கோத்தா பாரு:
கிளந்தான், கோத்தா பாருவில் உள்ள மெலூர் பொதுச்சந்தையில் (Melor Public Market) ஏற்பட்ட பயங்கர மோதல் மற்றும் கலவரம் தொடர்பாக 5 ஆண்கள் மற்றும் 7 பெண்கள் உட்பட மொத்தம் 12 பேரை போலீசார் கைது செய்துள்ளனர்.
நேற்று மதியம் 2.30 மணியளவில் இந்தச் சம்பவம் நிகழ்ந்துள்ளது. 19 வயது இளம் பெண் ஒருவர் அளித்த புகாரின் அடிப்படையில் இந்தத் துரித நடவடிக்கை எடுக்கப்பட்டுள்ளது. அந்தப் பெண் அளித்த புகாரில்,
20 வயது மதிக்கத்தக்க மற்றொரு பெண் தன்னைத் தாக்கியதாகக் குறிப்பிட்டுள்ளார்.இந்தத் தனிப்பட்ட மோதல், இரு தரப்பு குடும்பத்தினருக்கும் இடையே பெரிய கலவரமாக மாறியுள்ளது என்று, கோத்தா பாரு மாவட்டப் போலீஸ் தலைவர் ஏசிபி முகமட் ரோஸ்டி டாவுட் கூறினார்.
“இந்த மோதலில் புகார்தாரரான அந்தப் பெண் உடல் முழுவதும் காயமடைந்துள்ளார். இந்தச் சம்பவத்திற்கான உண்மையான காரணம் குறித்து இன்னும் தீவிர விசாரணை நடத்தப்பட்டு வருகிறது,” என்று அவர் சொன்னார்.
இந்தச் சம்பவம் தொடர்பாக மலேசியத் தண்டனைச் சட்டம் பிரிவு 147-ன் (கலவரத்தில் ஈடுபடுதல்) கீழ் வழக்குப் பதிவு செய்யப்பட்டுள்ளது.
கைது செய்யப்பட்டவர்கள் 20 முதல் 50 வயதுக்குட்பட்டவர்கள். அவர்கள் அனைவரும் தடுப்புக் காவலில் (Remand) எடுத்து விசாரணை செய்வதற்காக கோத்தா பாரு மஜிஸ்திரேட் நீதிமன்றத்தில் இன்று ஆஜர்படுத்தப்பட உள்ளனர் என்று அவர் மேலும் கூறினார்.
சந்தையில் மக்கள் நடமாட்டம் மிகுந்த நேரத்தில் ஏற்பட்ட இந்த வன்முறைச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
