கோத்தா திங்கி:
மலேசியக் கடற்படையின் பாதுகாப்புத் தேவைகளுக்காக மேற்கொள்ளப்பட்டு, பின்னர் ரத்து செய்யப்பட்ட ஏவுகணை கொள்முதல் ஒப்பந்தத்திற்கான முழுத் தொகையையும் விரைந்து திருப்பித் தருவதற்கு நார்வே அரசாங்கம் தகுந்த நடவடிக்கை எடுக்க வேண்டும் என மலேசியா வலியுறுத்தியுள்ளது.
இந்த விவகாரத்தில் ஏற்பட்டுள்ள சிக்கல்களுக்கு நார்வேயின் கொள்கை முடிவே காரணம் என்பதால், அந்நாட்டு அரசாங்கம் தனது பொறுப்பில் இருந்து எக்காரணத்தைக் கொண்டும் தட்டிக்கழிக்கக் கூடாது என்று மலேசியத் தற்காப்பு அமைச்சர் டத்தோஸ்ரீ முகம்மது காலிட் நூர்தின் திட்டவட்டமாகத் தெரிவித்துள்ளார்.
அண்மையில் நார்வே தற்காப்பு அமைச்சர் டூரே சாண்ட்விக்கை (Tore Sandvik) நேரில் சந்தித்துப் பேசியபோது மலேசியாவின் இந்த உறுதியான நிலைப்பாட்டை அவரிடம் தெளிவாக எடுத்துரைத்ததாக, இன்று நடைபெற்ற செய்தியாளர்கள் சந்திப்பில் அமைச்சர் காலிட் நூர்தின் குறிப்பிட்டார்.
மலேசியக் கடற்படையின் கடலோரப் போர்க் கப்பல்களுக்காக (Littoral Combat Ships – LCS) நார்வே நாட்டிடமிருந்து அதிநவீன ‘நேவல் ஸ்டிரைக் மிசைல்’ (Naval Strike Missile) ஏவுகணை முறையைக் கொள்முதல் செய்ய ஒப்பந்தம் செய்யப்பட்டிருந்தது. ஆனால், இந்த ஏவுகணைகளுக்கான ஏற்றுமதி உரிமத்திற்கு (Export License) ஒப்புதல் அளிக்க நார்வே அரசாங்கம் திடீரென மறுத்துவிட்டது.
“மலேசியாவிற்கான ஏற்றுமதி உரிமத்தை வழங்கக் கூடாது என்ற நார்வேயின் நிர்வாக ரீதியிலான முடிவே ஒட்டுமொத்தப் பிரச்சினைக்கும் மூலக் காரணமாகும். அவர்களின் இந்தத் தன்னிச்சையான முடிவுதான் தற்போதைய முட்டுக்கட்டையை உருவாக்கியுள்ளது. எனவே, இதற்கான விளைவுகளுக்கு நார்வேயே பொறுப்பேற்க வேண்டும்,” என அமைச்சர் காலிட் நூர்தின் சுட்டிக்காட்டினார்.
மலேசியாவுடனான இருதரப்பு நல்லுறவையும் தூதரக விசுவாசத்தையும் தொடர்ந்து நீட்டிக்க நார்வே உண்மையிலேயே விரும்பினால், பணத்தைத் திருப்பித் தரும் செயல்முறையை (Refund Process) அது முன்னின்று விரைவுபடுத்த வேண்டும் என்று நார்வே தற்காப்பு அமைச்சரிடம் வலியுறுத்தப்பட்டுள்ளது.
அதோடு, சம்பந்தப்பட்ட பாதுகாப்புத் தளவாட உற்பத்தி நிறுவனத்திடமிருந்து அதிகாரப்பூர்வமாகப் பணம் திரும்பப் பெறப்படுவதற்கு நீண்ட காலம் ஆகலாம் என்பதால், அதற்கு இடைப்பட்ட காலத்தில் நார்வே அரசாங்கமே அந்த ஒப்பந்தத் தொகையை ‘முன்கூட்டியே’ (Advance Payment) மலேசியாவிற்குத் திருப்பி வழங்குவது குறித்துப் பரிசீலிக்கலாம் என்ற அதிரடி யோசனையையும் மலேசியா முன்வைத்துள்ளது.
